މިދިޔަ ހަފުތާގެ ތެރޭގައި ހިމަބިހި ނުވަތަ މީސްލްސްގެ އިތުރު 5 ކޭސް ފެނިފައިވާ ކަމަށް ހެލްތު ޕްރޮޓެކްޝަން އޭޖެންސީ، އެޗްޕީއޭއިން ބުނެފިއެވެ.
ދުނިޔޭގެ އެކި ސަރަޙައްދުތަކުގައި މި ބަލި އިތުރުވަމުންދާ ދަނޑިވަޅެއްގައި، ރާއްޖެއިން މި ފެނުނު ކޭސްތަކަކީ އާންމު ސިއްހީ ރައްކާތެރިކަމަށްޓަކައި އެންމެން ސަމާލުވާންޖެހޭ ކަމެކެވެ. މިއަހަރުގެ މިހާތަނަށް ޖުމްލަ ހަތް ކޭސް ފެނިފައިވާއިރު، ބަލި ފެތުރުން ހުއްޓުވުމަށްޓަކައި ވަގުތުން ފިޔަވަޅު އެޅުމަކީ ކޮންމެހެން ބޭނުންތެރި ކަމެކެވެ.
ހިމަބިއްސަކީ ކޯވިޑް-19 އާއި ޓީބީ ފަދަ ބަލިތަކަށްވުރެ ވެސް މާ ހަލުވިކޮށް، ވަރަށް ފަސޭހައިން ގައިންގަޔަށް އަރާ ބައްޔެކެވެ. އެހެންކަމުން، މި ބަލި ކޮންޓްރޯލް ކުރުމަށް އެޗްޕީއޭއިން މިހާރު ވަނީ ޚާއްސަ މަސައްކަތްތަކެއް ފަށާފައެވެ.
އެޗްޕީއޭއިން ބުނީ ފެނުނު ކޭސްތަކާ ގުޅިގެން 74 އަށްވުރެ ގިނަ މީހުން ކޮންޓެކްޓުންގެ ގޮތުގައި ފާހަގަކުރެވިފައިވާ ކަމަށެވެ.
ބަލި ޖެހުނު މީހުންނާ ދިމާވި ފަރާތްތަކުގެ ތެރެއިން ވެކްސިން ފުރިހަމަނުވާ މީހުންނަށް ވެކްސިން ދިނުމުގެ މަސައްކަތް މިހާރު ދަނީ ކުރަމުންނެވެ. އަދި ބަލި ޖެހުނު ގޮތް ދެނެގަތުމަށްޓަކައި މާލެ ސަރަހައްދުގައި ކޭސް އިންވެސްޓިގޭޝަންތައް ވެސް ދަނީ ހަދަމުންނެވެ.
ރާއްޖެއަކީ 2017 ވަނަ އަހަރު ހިމަބިހި ނައްތާލެވިފައިވާ ގައުމެއްގެ ގޮތުގައި ދުނިޔޭގެ ސިއްހަތު ޖަމިއްޔާއިން ކަނޑައަޅާފައިވާ ގައުމެކެވެ. މި ކާމިޔާބީގެ އަސްލަކީ 1983 އިން ފެށިގެން ދެމުން އަންނަ ވަރުގަދަ ވެކްސިން ޕްރޮގްރާމެވެ.
ނަމަވެސް، ދޭތެރެއަކުން މި ބަލި ރާއްޖޭގައި ވެސް ފެނިފައި އެބަހުއްޓެވެ.
ހިމަބިހީގެ އެއްވެސް އަލާމާތެއް ފެނިއްޖެނަމަ، ލަސްނުކޮށް ސިއްހީ ފަރުވާ ހޯދުމަކީ ބަލި އިތުރަށް ފެތުރުނު ނުދިނުމަށް އެޅޭނެ އެންމެ މުހިންމު ފިޔަވަޅެވެ. ސަމާލުކަންދޭންޖެހޭ އަލާމާތްތަކަކީ:
- ގަދައަށް ހުން އައުން.
- ހަމުގައި ރަތް ބިހިތަކެއް ނެގުން.
- ކެއްސުން، ނޭފަތުން އަރިދަފުސް ފޭބުން އަދި ލޯ ރަތްވުން.
މިފަދަ އަލާމާތެއް ފެނިއްޖެނަމަ، މީހުން އެއްވެ އުޅޭ ތަންތަނަށް ނުގޮސް، ލަސްނުކޮށް ސިއްހީ އެހީތެރިއެއްގެ ލަފާ ހޯއްދުމަށް އެޗްޕީއޭއިން ވަނީ އިލްތިމާސްކޮށްފައެވެ.