ރައީސުލްޖުމްހޫރިއްޔާގެ އޮފީހާއި، ރައީސުލްޖުމްހޫރިއްޔާގެ ރަސްމީ ގެކޮޅު ކަމަށްވާ މުލީއާގެއާއި، ނައިބު ރައީސްގެ ރަސްމީ ގެކޮޅު ހިލާލީގޭގައި ދިގު މުއްދަތަކަށް ޚިދުމަތް ކުރެއްވި ވ. ކަނި، އާދަމް ޢަލީ ނިޔާވުމާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަޢުޒިޔާ ފޮނުއްވައިފިއެވެ.
إِنَّا لِلَّٰهِ وَإِنَّا إِلَيْهِ رَاجِعُونَ
ވ.ކަނި، އާދަމް ޢަލީއަކީ ރައީސުލްޖުމްހޫރިއްޔާގެ އޮފީހާއި، މުލީއާގެއާއި ހިލާލީގޭގައި ދިގު މުއްދަތެއްގައި މަސައްކަތްކުރައްވައިފައިވާ، ވަފާތެރިކަމާއެކު ވަޒީފާގެ ވާޖިބުތައް އަދާކުރެއްވި،އާދަމް ޢަލީ ޚިދުމަތްކުރެއްވި ކޮންމެ ރައީސެއް އަދި… pic.twitter.com/6vxbdZDLeU
— Dr Mohamed Muizzu (@MMuizzu) May 22, 2026
ދައުލަތަށް ޚިދުމަތް ކުރުމުގެ އިނާމުވެސް ހާސިލުކުރެއްވި އާދަމް ޢަލީ ނިޔާވީ އުމުރުން 62 އަހަރުގައި ސްރީލަންކާގައެވެ. އޭނާގެ މައްޗަށް ކުރެވޭ ކަށުނަމާދު އޮތީ މިއަދުގެ ޢަޞުރު ނަމާދަށްފަހު، ސްރީލަންކާގެ ކޮޅުނބުގައި ހުންނަ ޖާވައްތަ ޖުމުޢަ މިސްކިތުގައެވެ. އޭނާ ނިޔާވިއިރު، ދައުލަތުގެ ޚިދުމަތުގައި 44 އަހަރަށްވުރެ ދިގު މުއްދަތެއް ވަނީ ހޭދަކުރައްވާފައެވެ.
ރައީސުލްޖުމްހޫރިއްޔާ ފޮނުއްވި ތަޢުޒިޔާގެ މެސެޖުގައި، މަރްޙޫމް އާދަމް ޢަލީއަކީ ވަޒީފާގެ މަސްއޫލިއްޔަތުތައް ނުހަނު ވަފާތެރިކަމާއި އިޚްލާޞްތެރިކަމާއެކު އަދާކުރެއްވި ނަމޫނާ ޚިދުމަތްތެރިއެއްގެ ގޮތުގައި ވަނީ ސިފަކުރައްވާފައެވެ. އަދި އޭނާއަކީ އެކި ދައުރުތަކުގައި ޚިދުމަތް ކުރެއްވި ރައީސުންނާއި ނައިބު ރައީސުންގެ އިތުބާރާއި ލޯބި ހޯއްދަވާފައިވާ، ހަރުދަނާ އަދި މަޑުމައިތިރި ޝަޚްޞިއްޔަތެއްގެ ވެރިއެއްކަންވެސް ރައީސް ފާހަގަކުރެއްވިއެވެ.
އާދަމް ޢަލީގެ ވަކިވެދިއުމަކީ، އޭނާއާއެކު ރައީސް އޮފީހާއި ރަސްމީ ގެކޮޅުތަކުގައި މަސައްކަތް ކުރެއްވި ހުރިހާ މުވައްޒަފުންނަށާއި، އޭނާގެ އާއިލާއަށް ލިބުނު ފުން ހިތާމައެއްކަން ފާހަގަކުރައްވައި، ރައީސް ވަނީ އެ ފަރާތްތަކަށް ކެތްތެރިކަން ދެއްވުން އެދިވަޑައިގެންފައެވެ. އާދަމް ޢަލީއަކީ އޭނާގެ މަސައްކަތުގެ ދާއިރާގައި އެންމެންގެ އިޙްތިރާމް ލިބިފައިވާ ބޭފުޅެކެވެ.
ރައީސުލްޖުމްހޫރިއްޔާގެ މެސެޖު ނިންމަވާލައްވާފައިވަނީ، މަރްޙޫމް އާދަމް ޢަލީގެ ފުރާނައަށް މާތްﷲގެ ތަނަވަސް ރަޙްމަތާއި ނިޢުމަތް މިންވަރުކޮށްދެއްވައި، ސުވަރުގޭގެ ދާއިމީ ނިޢުމަތް ދެއްވުން އެދި ދުޢާ ކުރައްވަމުންނެވެ. އާދަމް ޢަލީއަކީ ދައުލަތުގެ އެކި ފަންތީގެ ބޭފުޅުންނާ ގާތް ގުޅުމެއް ބޭއްވެވި، ޚިދުމަތުގެ ދާއިރާގައި ފާހަގަކޮށްލެވޭ ފަދަ ޚިދުމަތްތަކެއް ކުރެއްވި ބޭފުޅެކެވެ.