ދ. މީދޫ ކައުންސިލްގެ ރައީސް ހޮވުމަށް މިއަދު ބޭއްވި އިންތިޚާބުގެ އިތުރު ބުރު، ސަރުކާރު ހިންގާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ކެންޑިޑޭޓް ސުހާ އިބްރާހީމް ކާމިޔާބުކުރެއްވުމާއި ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ސުހާއަށް މަރުހަބާ ވިދާޅުވެއްޖެއެވެ.
— Dr Mohamed Muizzu (@MMuizzu) June 13, 2026
މިއަދު ހެނދުނު 8:00 އިން ފެށިގެން ކުރިއަށްދިޔަ މި އިންތިޚާބުގައި ސުހާއާ ވާދަކުރެއްވީ މޯލްޑިވްސް ޑިމޮކްރެޓިކް އެލަޔަންސް (އެމްޑީއޭ) ގެ ކެންޑިޑޭޓް މުޙައްމަދު ޝާހިދެވެ. އިންތިޚާބުގެ ވަގުތީ ނަތީޖާ ދައްކާގޮތުން ސުހާއަށް 529 ވޯޓު ލިބިވަޑައިގެންފައިވާއިރު، ޝާހިދަށް ލިބިވަޑައިގަތީ 449 ވޯޓެވެ. މި އިންތިޚާބުގައި ވޯޓުލުމުގެ ޙައްޤު ޖުމްލަ 1,049 މީހަކަށް ލިބިފައިވެއެވެ.
މީދޫ ކައުންސިލްގެ ރައީސް ހޮވުމަށް އަލުން ވޯޓުލާން ޖެހުނީ، މީގެ ކުރިން ބޭއްވި ލޯކަލް ކައުންސިލް އިންތިޚާބުގެ ވޯޓު ގުނުމުގައި ދިމާވި މައްސަލަތަކަކާ ގުޅިގެން އެ އިންތިޚާބުގެ ނަތީޖާ ބާތިލުކުރުމުންނެވެ. އިލެކްޝަންސް ކޮމިޝަނުން މި އިންތިޚާބަށްޓަކައި މީދޫގައި ދެ ފޮށި އަދި މާލޭގައި އެއް ފޮށި ބަހައްޓާފައިވެއެވެ.
ސުހާގެ މި ކާމިޔާބީއާއެކު މީދޫ ކައުންސިލްގެ ހުރިހާ ގޮނޑިއެއް މިހާރު ވަނީ ޕީއެންސީން ކާމިޔާބުކޮށްފައެވެ. މީގެ ކުރިން ބޭއްވި އިންތިޚާބުގައި އެ ރަށު ކައުންސިލް މެންބަރުކަމަށް ހޮވިވަޑައިގެންނެވި ޙުސައިން ރަޝީދާއި، އަންހެނުންނަށް ޚާއްޞަ ކުރި ގޮނޑި ކާމިޔާބުކުރެއްވި މިސްކާ ޢަބްދުއްރަޙްމާނަކީވެސް ޕީއެންސީގެ މެންބަރުންނެވެ.
ރައީސުލްޖުމްހޫރިއްޔާ އެކްސްގައި ކުރެއްވި ޕޯސްޓެއްގައި ވަނީ ސުހާއަށް މަރުހަބާ ދަންނަވައި، އޭނާއަށް ވޯޓު ދެއްވި މީދޫގެ ރައްޔިތުންނަށާއި އިންތިޚާބު ކާމިޔާބު ކުރުމަށް މަސައްކަތް ކުރި ހުރިހާ ފަރާތްތަކަށް ޝުކުރު އަދާކުރައްވާފައެވެ. މީދޫ ކައުންސިލްގެ މެޖޯރިޓީ ޕީއެންސީން ދެމެހެއްޓުމަކީ ސަރުކާރުގެ ސިޔާސަތުތަކަށް ރައްޔިތުން ކުރާ އިތުބާރު ހާމަވާ ކަމެއްގެ ގޮތުގައި ސިޔާސީ މަސްރަޙު ދިރާސާކުރާ ފަރާތްތަކުން ފާހަގަކުރެއެވެ.