ވ. އަތޮޅު އަލިމަތާ ކައިރީގައި އޮންނަ ކަނޑުއަޑީގެ ހޮހަޅައެއްގައި ހިނގި ހިތާމަވެރި ހާދިސާއާ ގުޅިގެން ހިންގި ޑައިވިންގ އޮޕަރޭޝަންގައި ބައިވެރިވި ސިފައިންނާއި ފުލުހުންގެ ޚިދުމަތުގެ އަގު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަޒަންކުރައްވައިފިއެވެ.
މި އޮޕަރޭޝަނަކީ ނުރައްކާތެރި މާހައުލެއްގައި، ގިނަ ގޮންޖެހުންތަކަކާއެކު ކުރިއަށްގެންދިޔަ މަސައްކަތެކެވެ.
ބަންޑާރަކޮށީގައި ބޭއްވި ޚާއްޞަ ރަސްމިއްޔާތެއްގައި، މި އޮޕަރޭޝަންގައި ބައިވެރިވި ފަރާތްތަކަށް ރައީސުލްޖުމްހޫރިއްޔާގެ ފަރާތްޕުޅުން ހަނދާނީ ލިޔުން ހަވާލުކޮށްދެއްވީ މިނިސްޓަރ އޮފް ހޯމްލޭންޑް ސެކިއުރިޓީ، ލޭބަރ އެންޑް ޓެކްނޯލޮޖީ ޢަލީ އިޙްސާންއާއި، މިނިސްޓަރ އޮފް ޑިފެންސް އެންޑް ނޭޝަނަލް ސާވިސް ޙަސަން ރަޝީދެވެ. މި ރަސްމިއްޔާތުގައި ކޮމިޝަނަރ އޮފް ޕޮލިސް އަޙްމަދު މުޙައްމަދާއި، ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހީމް ޙިލްމީގެ އިތުރުން ސަލާމަތީ ބާރުތަކުގެ އިސް އޮފިސަރުން ބައިވެރިވެވަޑައިގެންނެވިއެވެ.
މި ހިތާމަވެރި ހާދިސާ ހިނގާފައިވަނީ ވ. އަތޮޅު އަލިމަތާ ކައިރީގައި އޮންނަ ކަނޑުއަޑީގެ ހޮހަޅައެއްގެ ތެރޭގައެވެ. މި ހާދިސާގައި އިޓަލީގެ ފަސް މީހަކު ވަނީ މަރުވެފައެވެ. އޭގެ ތެރޭގައި ޖެނޯއާ ޔުނިވަރސިޓީގެ ޕްރޮފެސަރަކާއި، އޭނާގެ ދަރިފުޅުގެ އިތުރުން ރިސާޗަރުންނާއި ސަފާރީއެއްގެ ޑައިވިންގ އިންސްޓްރަކްޓަރަކު ހިމެނެއެވެ.
މި މީހުން ހޯދުމަށް ހިންގި ވަރުގަދަ އޮޕަރޭޝަނަކީ ކަނޑުގެ ފުން ސަރަޙައްދުތަކެއްގައި، ނުރައްކާތެރި ހާލަތްތަކެއްގެ ތެރޭގައި ކުރިއަށްގެންދިޔަ މަސައްކަތެކެވެ. މި އޮޕަރޭޝަންގެ ތެރޭގައި ސިފައިންގެ ބޭކަލަކު ވެސް ވަނީ ނިޔާވެފައެވެ. ރައީސުލްޖުމްހޫރިއްޔާ ވަނީ މި އޮޕަރޭޝަންގައި ބައިވެރިވި ހުރިހާ ފަރާތްތަކުން ދެއްކެވި ހިތްވަރާއި، ޤައުމީ ޚިދުމަތުގެ އަގު ވަޒަންކުރައްވާފައެވެ.