ވެލާނާ އިންޓަނޭޝަނަލް އެއާޕޯޓް (ވީއައިއޭ) ހިންގަމުން އަންނަ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން އެ ކުންފުނީގެ މުވައްޒަފުންނަށް އިންޒާރު ދެމުންދާ ކަމަށް ބުނެ ބައެއް މީޑިއާތަކުން ފަތުރަމުންދާ ޚަބަރުތައް އެ ކުންފުނިން ރަސްމީކޮށް ދޮގުކޮށްފިއެވެ.
މިކަމާ ގުޅިގެން އެމްއޭސީއެލް އިން ބުނެފައިވަނީ، އެއާޕޯޓުގެ ސަލާމަތީ ކަންކަން ވަރުގަދަ ކުރުމުގެ ގޮތުން ނެރޭ އިރުޝާދުތަކަކީ މުވައްޒަފުންނަށް ދެވޭ އިންޒާރެއް ނޫން ކަމަށެވެ.
މީޑިއާތަކުގައި ރިޕޯޓުކޮށްފައިވާ ގޮތުގައި، އެއާޕޯޓުގެ މުވައްޒަފުންނަށް ދޫކޮށްފައިވާ ސެކިއުރިޓީ ފާސްތައް، ރަސްމީ މަސައްކަތުން ބޭރުގައި ނަހަމަ ގޮތުގައި ބޭނުންކުރާ ފަރާތްތަކާ މެދު ހަރުކަށި ފިޔަވަޅު އަޅާނެ ކަމުގެ އިންޒާރު ދީ އެމްއޭސީއެލް އިން ވަނީ ސާކިއުލާއެއް ނެރެފައެވެ. ނަމަވެސް، އެމްއޭސީއެލް އިން މައުލޫމާތު ދެމުން ބުނެފައިވަނީ، އެއާޕޯޓަކީ ސަލާމަތީ ގޮތުން ނާޒުކު އަދި ވަރުގަދަ ސެކިއުރިޓީއެއް ބަލަހައްޓަންޖެހޭ ތަނަކަށް ވާތީ، މުވައްޒަފުންގެ ސަމާލުކަމަށް މިފަދަ ކަންކަން ގެނައުމަކީ އާންމުކޮށް ކުރަމުން އަންނަ ކަމެއް ކަމަށެވެ.
އެ ކުންފުނިން އިތުރަށް ފާހަގަކުރި ގޮތުގައި، އެއާޕޯޓުގެ ރައްކާތެރިކަން ކަށަވަރު ކުރުމަށްޓަކައި މުވައްޒަފުންނަށް އެކި ކަންކަމާ ގުޅޭގޮތުން ހަނދާން އައުކޮށްދީ، ސާކިއުލާތައް ނެރުމަކީ ކުންފުނީގެ އުސޫލުތަކުގެ ތެރެއިން ކުރިއަށްދާ ކަމެކެވެ. ބައެއް މީޑިއާތަކުން މި ސާކިއުލާއަކީ ވަކި ހާއްސަ ކަމަކާ ގުޅުވައިގެން ނެރުނު އެއްޗެއްގެ ގޮތުގައި ދެއްކުމަށް މަސައްކަތް ކުރި ނަމަވެސް، އެއީ ހަގީގަތާ ހިލާފު ވާހަކަތަކެއް ކަމަށް އެމްއޭސީއެލް އިން ބުނެއެވެ.
އެއާޕޯޓުގެ ސެކިއުރިޓީ ބެލެހެއްޓުމުގައި އެންމެ މުހިންމު ދައުރެއް އަދާކުރަނީ އެތަނުގެ މުވައްޒަފުން ކަމަށްވާއިރު، ދޭތެރެ ދޭތެރެއިން މިފަދަ އިރުޝާދުތައް ދިނުމަކީ މުޅި އެއާޕޯޓުގެ ސަލާމަތަށް އެޅޭ މުހިންމު ފިޔަވަޅެކެވެ. މިއީ އަލަށް ކުރި ކަމެއް ނޫން ކަމަށާއި، މީގެ ކުރިން ވެސް އެކި ފަހަރު މަތިން މިފަދަ ސާކިއުލާތައް ނެރެފައިވާނެ ކަމަށް އެ ކުންފުނިން މައުލޫމާތު ދެއެވެ.
ރާއްޖޭގެ މައި ދޮރޯށީގެ ގޮތުގައި ބެލެވޭ ވެލާނާ އިންޓަނޭޝަނަލް އެއާޕޯޓުގެ ބޯޑަރު ސެކިއުރިޓީ ހަރުދަނާ ކުރުމަށާއި، ކުށްކުރުމަށް އޮންނަ ފުރުސަތުތައް ހަނިކުރުމަށް އެމްއޭސީއެލް އިން އަންނަނީ ގިނަ މަސައްކަތްތަކެއް ކުރަމުންނެވެ. މިގޮތުން މުވައްޒަފުންގެ ސުލޫކީ މިންގަނޑުތަކާއި، ސަލާމަތީ އުސޫލުތަކަށް ބޯލެނބުމަކީ ކުންފުނިން އެންމެ އިސްކަންދޭ އެއް ކަންތައް ކަމުގައި އެ ކުންފުނިން ވަނީ ބުނެފައެވެ.
އެމްއޭސީއެލް އިން ވަނީ އެއާޕޯޓުގެ ސަލާމަތާއި ރައްކާތެރިކަމަށް ބުރޫއަރާފަދަ އެއްވެސް އަމަލެއް އެއްވެސް ފަރާތަކުން ނުހިންގުމަށް އިލްތިމާސްކޮށްފައެވެ. އަދި މުވައްޒަފުންގެ ހައްގުތަކަށް އުނިކަން އަންނަ ފަދަ އެއްވެސް ކަމެއް ކުންފުނިން ނުކުރާނެ ކަމުގެ ޔަގީންކަން ވެސް ވަނީ ދީފައެވެ.