ރާއްޖޭގެ އެކި ސަރަހައްދުތަކުގައި ހިމެނޭ 24 ރަށެއްގައި 50 މެގަވޮޓަށްވުރެ ގިނަ އިއާދަކުރަނިވި ހަކަތަ އުފެއްދުމުގެ މަސައްކަތް ފެށުމަށް ތިމާވެއްޓާއި ހަކަތައާ ބެހޭ ވުޒާރާއިން ތައްޔާރުވެއްޖެއެވެ.
މި މަޝްރޫއަކީ އެ ވުޒާރާއިން ކުރިއަށްގެންދާ އެސްޕަޔަރ (ASPIRE) އަދި އެރައިޒް (ARISE) މަޝްރޫއުގެ ދަށުން ހިންގުމަށް ހަމަޖެހިފައިވާ މުހިންމު ހަރަކާތެކެވެ.
The Ministry's ASPIRE and ARISE Projects intend to establish more than 50 megawatts of renewable energy generation across the Maldives' 24 islands. The project will significantly contribute to the nation's goal of reducing fossil fuel dependency, accelerating toward the… pic.twitter.com/1NASvPbKDI
— Min. of Climate Change, Environment and Energy, MV (@MoEnvmv) July 5, 2026
ތިމާވެއްޓާ ބެހޭ ވުޒާރާއިން ހާމަކުރި ގޮތުގައި، މި ބިޔަ މަޝްރޫއުގެ މައިގަނޑު މަގުސަދަކީ ރާއްޖޭގައި ކަރަންޓު އުފެއްދުމަށް ތެލަށް ބަރޯސާވާ މިންވަރު ކުޑަކުރުމެވެ. މީގެ އިތުރުން، ތިމާވެއްޓާ ރައްޓެހި ގޮތްގޮތަށް ހަކަތަ އުފައްދައި، ޖައްވަށް ބޭރުކުރާ ވިހަ ގޭސްތައް މަދުކުރުމަކީ ވެސް މި މަސައްކަތުގެ ބޮޑު އަމާޒެކެވެ. މި ނިޒާމުތައް ގާއިމުކުރެވުމުން، ހަކަތަ އުފެއްދުމަށް ކުރާ ހަރަދުތައް ބޮޑުތަނުން ކުޑަވެގެންދާނެ ކަމަށް އެ ވުޒާރާއިން ލަފާކުރެއެވެ.
މި މަޝްރޫއަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކަނޑައަޅުއްވާފައިވާ ހަކަތައިގެ ސިޔާސަތަށް ވާސިލްވުމަށް އެޅޭ މުހިންމު ފިޔަވަޅެކެވެ. ރައީސްގެ އަމާޒަކީ 2028 ވަނަ އަހަރުގެ ނިޔަލަށް ރާއްޖޭގައި ބޭނުންކުރާ ކަރަންޓުގެ 33 އިންސައްތައަކީ އިއާދަކުރަނިވި ހަކަތައިން އުފައްދާ ކަރަންޓަށް ހެދުމެވެ. މިހާރު ފެށުމަށް ތައްޔާރުވާ މަޝްރޫއުގެ ސަބަބުން މި އަމާޒަށް ވާސިލްވުމަށް ބޮޑު ބާރަކަށް ވެގެންދާނެއެވެ.
މި މަޝްރޫއުގެ ދަށުން ރާއްޖޭގެ އުތުރާއި ދެކުނުގެ އެކި ރަށްތަކުގައި އިރުގެ އަލިން ހަކަތަ އުފައްދާ ނިޒާމުތައް ގާއިމުކުރުމަށް ވަނީ ހަމަޖެހިފައެވެ. މީގެ ސަބަބުން ރާއްޖެއަށް ބޭރުން އެތެރެކުރާ ތެލަށް ކުރާ ބޮޑު ހޭދަ ސަލާމަތް ކުރެވި، އިގްތިސާދީ ގޮތުންނާއި ތިމާވެށީގެ ގޮތުން ރާއްޖެއަށް ބޮޑެތި ކުރިއެރުންތަކެއް ލިބިގެންދާނެ ކަމަށް ސަރުކާރުން ގަބޫލުކުރެއެވެ.