ދިވެހިރާއްޖެއަށް މިހާރު ރަސްމީ ދަތުރުފުޅެއް ކުރައްވަމުން ގެންދަވާ ސައުދީ އަރަބިއްޔާގެ މަތީ ފަންތީގެ ވަފުދެއް، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އަރިހަށް އިހުތިރާމުގެ ޒިޔާރަތެއް ކުރައްވައިފިއެވެ.
މިއަދު ރައީސުލްޖުމްހޫރިއްޔާގެ އޮފީހުގައި ބޭއްވެވި މި ބައްދަލުކުރެއްވުމުގައި، ދެ ގައުމުގެ ދެމެދުގައި އޮތް ޒަމާންވީ ގާތް ގުޅުމާ ގުޅޭގޮތުންނާއި، ކުރިމަގުގައި އެކި ދާއިރާތަކުން ގުޅުން ބަދަހިކުރެވިދާނެ ގޮތްތަކާ ގުޅޭގޮތުން ފުޅާ ދާއިރާއެއްގައި މަޝްވަރާ ކުރެއްވިއެވެ.
މި ބައްދަލުކުރެއްވުމުގައި ރައީސުލްޖުމްހޫރިއްޔާ ވަނީ، މާތްވެގެންވާ ދެ ހަރަމްފުޅުގެ ހާދިމް، ސައުދީ އަރަބިއްޔާގެ ރަސްގެފާނު ސަލްމާން ބިން އަބްދުލްއަޒީޒް އާލް ސައުދާއި، ސައުދީގެ ވަލީއަހުދު އަދި ބޮޑުވަޒީރު މުހައްމަދު ބިން ސަލްމާން ބިން އަބްދުލްއަޒީޒް އާލް ސައުދު، ރާއްޖެއާމެދު ބަހައްޓަވާ ހާއްސަ ގާތްކަމަށްޓަކައި ޝުކުރު އަދާކުރައްވާފައެވެ. ހާއްސަކޮށް ރާއްޖޭގެ އިގުތިސާދީ ކުރިއެރުމަށާއި އިޖުތިމާއީ ތަރައްގީއަށް ސައުދީ ސަރުކާރުން ދެއްވަމުން ގެންދަވާ ދީލަތި އެހީތެރިކަމާއި އެއްބާރުލެއްވުމުގެ އަގު ރައީސް ވަޒަންކުރެއްވިއެވެ.
ސައުދީ ވަފުދުގެ ބޭފުޅުން ދެއްކެވި ވާހަކަފުޅުގައި، ރާއްޖެއިން އެ ބޭފުޅުންނަށް ދެންނެވި ހޫނު މަރުހަބާއަށާއި ބެހެއްޓެވި ފުރިހަމަ މެހުމާންދާރީއަށްޓަކައި ދިވެހި ސަރުކާރަށް ވަރަށް ބޮޑަށް ޝުކުރު އަދާކުރެއްވިއެވެ. އަދި ދެ ގައުމުގެ ދެމެދުގައި އޮތް އުހުއްވަތްތެރި ގުޅުން އިތުރަށް ވަރުގަދަކޮށް، ދެ ގައުމުގެ މަސްލަހަތު ހިމެނޭ ކަންކަމުގައި ގުޅިގެން މަސައްކަތް ކުރުމުގެ ޝައުގުވެރިކަން ސައުދީ ވަފުދުން މި ބައްދަލުވުމުގައި ފާޅުކުރެއްވިއެވެ.
މި ބައްދަލުކުރެއްވުމުގައި ސައުދީ އަރަބިއްޔާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު، ޔަހްޔާ ހަސަން އަލްގަހްތާނީގެ އިތުރުން، ދިވެހި ސަރުކާރުގެ ކެބިނެޓްގެ ބައެއް ވަޒީރުންނާއި ރައީސުލްޖުމްހޫރިއްޔާގެ އޮފީހުގެ އިސް ވެރިން ބައިވެރިވެވަޑައިގެންނެވިއެވެ. މި ޒިޔާރަތަކީ ދެ ގައުމުގެ ދެމެދުގައި އޮތް ގުޅުން އާ ހަރުފަތަކަށް ގެންދިއުމަށް އެޅުނު މުހިންމު ފިޔަވަޅެއްގެ ގޮތުގައި ދެ ފަރާތުންވެސް ފާހަގަކުރެއްވިއެވެ.