ފީފާ ވޯލްޑް ކަޕް 2026 ގެ ގަދަ 16 ގެ ފަހު މެޗުގައި ކޮލަމްބިއާ ބަލިކޮށް، މުބާރާތުގެ ކުއާޓާ ފައިނަލުގެ ފަހު ޖާގަ ސްވިޒަލެންޑުން ހޯދައިފިއެވެ.
ކެނެޑާގެ ވެންކޫވަރުގައި ކުޅުނު މި މެޗުގެ ފުރިހަމަ ވަގުތާއި އިތުރު ވަގުތު ހަމަވިއިރު ދެ ޓީމުން ކުރެ އެއްވެސް ޓީމަކަށް ލަނޑެއް ނުޖެހުމުން، ނަތީޖާ ނެރުނީ ޕެނަލްޓީ ޖަހައިގެންނެވެ. ޕެނަލްޓީ ޝޫޓްއައުޓްގައި ސްވިޒަލެންޑުން ކުރިހޯދީ 4-3 ގެ ނަތީޖާއަކުންނެވެ.
މިއީ 1954 ވަނަ އަހަރުގެ ފަހުން ސްވިޒަލެންޑުން ވޯލްޑް ކަޕެއްގެ ކުއާޓާ ފައިނަލަށް ދަތުރުކުރި ފުރަތަމަ ފަހަރެވެ. މެޗުގެ ތެރޭގައި ދެ ޓީމަށްވެސް ލަނޑު ޖަހާނެ ރަނގަޅު ފުރުސަތުތަކެއް ލިބުނެވެ. އެގޮތުން ކޮލަމްބިއާގެ ގުސްޓާވޯ ޕުއެރްޓާ ފޮނުވާލި ނުރައްކާތެރި ހަމަލާއެއް ސްވިޒަލެންޑުގެ ކީޕަރު ގްރެގޯ ކޯބެލް ދިފާއުކުރިއިރު، އިތުރު ވަގުތުގެ ތެރޭގައި ކޮލަމްބިއާގެ ޖޯން ލޫކޫމީ ބޮލުން ފޮނުވާލި ބޯޅަ އަމާޒުވީ ގޯލުގެ ހުރަސްދަނޑިއަށެވެ. ސްވިޒަލެންޑުގެ ފޭބިއަން ރީޑާ އާއި ޑެން އެންޑޯއީއަށް ލިބުނު ފުރުސަތުތަކުގެ ބޭނުންވެސް އެ ޓީމަށް ވަނީ ހިފޭގޮތް ނުވެފައެވެ.
ޕެނަލްޓީ ޝޫޓްއައުޓްގައި ސްވިޒަލެންޑުގެ ކީޕަރު ކޯބެލް ވަނީ ކޮލަމްބިއާގެ ކޫޗޯ ހެނާންޑޭޒް ފޮނުވާލި ޕެނަލްޓީ ހުށިޔާރުކަމާއެކު ދިފާއުކޮށްފައެވެ. އަދި ކޮލަމްބިއާގެ ޑޭވިންސަން ސަންޗޭޒް ފޮނުވާލި ޕެނަލްޓީ އަމާޒުވީ ގޯލުގެ ހުރަސްދަނޑިއަށެވެ. ސްވިޒަލެންޑުގެ މެނުއަލް އަކަންޖީ ޖެހި ޕެނަލްޓީ ނާކާމިޔާބުވި ނަމަވެސް، އެ ޓީމުގެ ރޫބެން ވާގަސް ވަނީ ފަހު ޕެނަލްޓީ ކާމިޔާބުކޮށް ޓީމު މޮޅުކޮށްދީފައެވެ.
މި މެޗަށް ސްވިޒަލެންޑުން ނުކުތީ އެ ޓީމުގެ މުހިންމު ކުޅުންތެރިޔާ ޔޮހާން މަންޒަމްބީއަށް އަނިޔާގެ ސަބަބުން ނުކުޅެވޭނެކަން އެނގިފައި ވަނިކޮށެވެ. ކުއާޓާ ފައިނަލުގައި ސްވިޒަލެންޑުން ބައްދަލުކުރަން ޖެހޭނީ އެންމެ ފަހުގެ ޗެމްޕިއަން އާޖެންޓީނާއާއެވެ. އާޖެންޓީނާ ކުއާޓާއަށް ދަތުރުކުރީ މިސްރުގެ މައްޗަށް 3-2 އިން ކުރިހޯދައިގެންނެވެ.