ރާއްޖެއާއި އިންޑިއާއާ ދެމެދު މިނިވަން ވިޔަފާރީގެ އެއްބަސްވުމެއް (އެފްޓީއޭ) ގާއިމުކުރުމަށާއި، ދެ ގައުމުގެ ދެމެދުގައި އޮތް އިގުތިސާދީ ގުޅުން އިތުރަށް ހަރުދަނާކުރުމާ ގުޅޭގޮތުން މިނިސްޓަރ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް މުހައްމަދު ސައީދު، އިންޑިއާގެ ކޮމާޝަލް އެންޑް އިންޑަސްޓްރިއަލް ވަޒީރު ޕިޔުޝް ގޯޔަލްއާ ބައްދަލުކުރައްވައި މަޝްވަރާކުރައްވައިފިއެވެ.
Minister @em_saeed held bilateral discussions with India’s Minister of Commerce and Industry, HE. @PiyushGoyal, focusing on strengthening trade, investment, and economic cooperation between the Maldives and India, during his official visit to India at the invitation of the Indian… pic.twitter.com/6pQBELlRV8
— Ministry of Economic Development,Transport & Trade (@MoEDmv) July 8, 2026
މި ބައްދަލުވުމާ ގުޅޭގޮތުން ވަޒީރު ސަޢީދު އެކްސްގައި ކުރެއްވި ޕޯސްޓެއްގައި ވިދާޅުވީ، އިންޑިއާގެ ވަޒީރާއެކު ބޭއްވެވި މަޝްވަރާތަކަކީ ވަރަށް ކާމިޔާބު އަދި އުފެއްދުންތެރި ބައްދަލުވުމެއް ކަމަށެވެ. މި ބައްދަލުވުމުގައި މައިގަނޑު ގޮތެއްގައި އަލިއަޅުވާލާފައިވަނީ ދެ ގައުމުގެ ދެމެދުގައި މިނިވަން ވިޔަފާރީގެ އެއްބަސްވުމެއް ގާއިމުކުރުމަށް މިހާރު ކުރެވެމުންދާ މަސައްކަތްތަކުގެ މައްޗަށެވެ.
މިނިވަން ވިޔަފާރީގެ އެއްބަސްވުމުގެ އިތުރުން، ދެ ގައުމުގެ ދެމެދުގައި އިންވެސްޓްމަންޓް މުއާހަދާއެއް އެކުލަވާލުމާ ގުޅޭގޮތުންވެސް ދެ ބޭފުޅުން ވަނީ ވާހަކަފުޅު ދައްކަވާފައެވެ. ވަޒީރު ފާހަގަކުރެއްވި ގޮތުގައި، މި މަސައްކަތްތަކަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒާއި އިންޑިއާގެ ބޮޑުވަޒީރު ނަރެންދުރަ މޯދީ، ދެ ގައުމުގެ އިގުތިސާދީ ކުރިއެރުމަށް ގެންގުޅުއްވާ ތަސައްވުރު ހަގީގަތަކަށް ހެއްދެވުމަށް ކުރެވޭ މުހިންމު މަސައްކަތްތަކެކެވެ.
މި ބައްދަލުވުމުގައި އިންޑިއާގެ ވަޒީރު ބެހެއްޓެވި މެހެމާންދާރީއަށް ޝުކުރު އަދާކުރައްވަމުން، ސައީދު ވިދާޅުވީ ދެ ގައުމުގެ ރައްޔިތުންނަށް ފައިދާކުރަނިވި ނަތީޖާތަކެއް ހާސިލުކުރުމަށްޓަކައި ގުޅިގެން މަސައްކަތްކުރުމަށް އުންމީދުކުރައްވާ ކަމަށެވެ. މި މަޝްވަރާތަކުގެ ސަބަބުން ދެ ގައުމުގެ ދެމެދުގައި އޮތް ވިޔަފާރީގެ މުއާމަލާތްތައް އިތުރަށް ފުޅާވެ، އައު އިންވެސްޓްމަންޓްތަކަށް ފުރުސަތު ހުޅުވިގެންދާނެ ކަމަށް ބެލެވެއެވެ.