ކާބަފައިން މަހަށް ދިޔައީ ރިޔާނެގި ކުދި ބައްތެލި ފަހަރުގައެވެ. އެއިރު އާންމުކޮށްދިޔައީ ކަޅުބިލަމަހަށެވެ. އިހުޒަމާނުގެ ރިޔަލު ބައްތެލިތަކުގައި މަސައްކަތް ބެހިފައި އޮންނަގޮތުން އެހާގިނަ ފަޅުވެރިން ބޭނުމެއް ނުވެއެވެ.
މައިގަނޑުކޮށް މަސައްކަތް ބެހިފައިވަނީ 5 ކަމެއްގެ މަށްޗަށެވެ. އެއީ އެން އުކުމާއި، ހުންގާނުގައި ހިފުމާއި، މަސްބުޅިއަށް ފެންލުމާއި، މަސްބޭނުމެވެ. މި މަސައްކަތްކުރުމަށް އެންމެ މަދުވެގެން ބޭނުންވަނީ 6 ފަޅުވެރިންނެވެ. އެއީ ދޯނީގެ ދެ ފަރާތަށް އެންއުކުމަށް 1 ފަޅުވެރިއަކާއި، ހުންގާނުގައި ހިފާ ފަޅުވެރިއާއި، ދޮށިއަޅާ 2 ފަޅުވެރިންނާއި، މަސްބުޅިއަށް ފެން އުކަންތިބޭ 2 ފަޅުވެރިންނެވެ.
އެހެންކަމުން، އެންމެ އިހުޒަމާނުގައި މަހަށް ދިއުމަށް ބޭނުންކުރި އޮޑިފަހަރުތައް 6 ފަޅުވެރިންނާއިއެކު މަހަށްފުރޭވަރު ވެއެވެ. އެޒަމާނުގެ ކުދި ދޯނިފަހަރުގައި ގިނަ އަދަދަކަށް ފަޅުވެރިން ދިޔަކަމުގައިވީނަމަވެސް، ދޮށިއަޅަން ޚާއްސަވެފައި ހުންނަނީ 2 ޖާގައެވެ.