މި އަހަރުގެ ފުރަތަމަ ހަ މަސްދުވަހުގެ ތެރޭގައި ދައުލަތަށް ބޭރު ފައިސާއިން ލިބުނު އާމްދަނީ، މިދިޔަ އަހަރުގެ އެ މުއްދަތާ އަޅާބަލާއިރު 9.6 އިންސައްތަ އިތުރުވެފައިވާކަން މޯލްޑިވްސް އިންލެންޑް ރެވެނިއު އޮތޯރިޓީ (މީރާ) ގެ ތަފާސްހިސާބުތަކުން ދައްކައިފިއެވެ.
މީރާއިން އާންމުކޮށްފައިވާ މާލީ ރިޕޯޓުތަކަށް ބަލާއިރު، 2026 ވަނަ އަހަރުގެ ޖަނަވަރީ މަހުން ފެށިގެން ޖޫން މަހުގެ ނިޔަލަށް ބޭރު ފައިސާގެ ގޮތުގައި ޖުމްލަ 867.9 މިލިއަން ޑޮލަރު ވަނީ ލިބިފައެވެ. މިއީ 2025 ވަނަ އަހަރުގެ އެ މުއްދަތުގައި ލިބުނު 791.3 މިލިއަން ޑޮލަރާ އަޅާބަލާއިރު 76.6 މިލިއަން ޑޮލަރުގެ އިތުރުވުމެކެވެ.
ތަފާސްހިސާބުތައް ދައްކާގޮތުން، ބޭރު ފައިސާއިން އެންމެ ބޮޑު އާމްދަނީއެއް ލިބިފައިވަނީ ފަތުރުވެރިކަމުގެ ދާއިރާއިން ނަގާ ޓީޖީއެސްޓީގެ ގޮތުގައެވެ. އެގޮތުން ޓީޖީއެސްޓީގެ ގޮތުގައި 431.4 މިލިއަން ޑޮލަރު ލިބިފައިވާއިރު، މިއީ މިދިޔަ އަހަރަށްވުރެ އިތުރު އަދަދެކެވެ. މީގެ އިތުރުން އާމްދަނީން ނަގާ ޓެކުހާއި ގްރީން ޓެކުހުގެ ގޮތުގައި ލިބުނު އާމްދަނީވެސް ވަނީ މިދިޔަ އަހަރާ އަޅާބަލާއިރު މަތިވެފައެވެ.
ޓެކުސް ނޫން ގޮތްގޮތުން ލިބުނު އާމްދަނީއަށް ބަލާއިރު، ފަތުރުވެރިކަމުގެ ބޭނުމަށް ދޫކުރާ ބިންތަކުގެ އިކުއިޒިޝަން ކޯސްޓުގެ ގޮތުގައި ލިބުނު ފައިސާ ވަނީ ބޮޑުތަނުން އިތުރުވެފައެވެ. މިދިޔަ އަހަރުގެ ފުރަތަމަ ހަ މަހު މި ބައިން 6.6 މިލިއަން ޑޮލަރު ލިބުނު ނަމަވެސް، މިއަހަރު އެ އަދަދު ވަނީ 39.8 މިލިއަން ޑޮލަރަށް އަރާފައެވެ.
ބޭރު ފައިސާއިން ލިބޭ އާމްދަނީ އިތުރުވުމުގެ މައިގަނޑު ސަބަބެއްގެ ގޮތުގައި ފާހަގަކުރެވެނީ، ބޭރު ފައިސާއިން އާމްދަނީ ލިބޭ ވިޔަފާރިތަކުން ދައްކަންޖެހޭ ބައެއް ޓެކުސްތައް ބޭރު ފައިސާއިން ދެއްކުން ސަރުކާރުން ލާޒިމުކުރުމެވެ. މީގެ ސަބަބުން ދައުލަތުގެ ބޭރު ފައިސާގެ ރިޒާވަށް ހެޔޮ ބަދަލުތަކެއް އަންނާނެ ކަމަށް ބެލެވެއެވެ.