އާސަންދަ ކުންފުނީގެ ހިދުމަތްތައް ރައްޔިތުންނަށް ވީހާވެސް ގާތުން ފޯރުކޮށްދިނުމުގެ މަގްސަދުގައި، ރާއްޖޭގެ އަށް ސަރަހައްދެއްގައި އެ ކުންފުނީގެ ހިދުމަތްދޭ ކައުންޓަރުތައް މިއަދު ރަސްމީކޮށް ހުޅުވައިފިއެވެ.
މި ކައުންޓަރުތައް ގާއިމުކުރުމާއެކު، އާސަންދަ ސްކީމުގެ ދަށުން ބޭސްފަރުވާގެ އެހީއަށް އެދުމާއި، އިދާރީ އެކި ކަންކަން ނިންމުމަށް ރައްޔިތުންނަށް ބޮޑެތި ލުއިފަސޭހަތަކެއް ލިބިގެންދާނެއެވެ. މީގެ ކުރިން މިފަދަ ހިދުމަތްތައް ހޯދުމަށް އެހެން ރަށްރަށަށް ކުރަންޖެހޭ ދަތުރުތައް މި ބަދަލާއެކު މަދުވެގެންދާނެ ކަމަށް އާސަންދަ ކުންފުނިން ބުނެއެވެ.
އަލަށް ކައުންޓަރުތައް ހުޅުވި ރަށްތައް:
- ރ. އުނގޫފާރު
- ބ. އޭދަފުށި
- ޅ. ނައިފަރު
- އދ. މަހިބަދޫ
- ދ. ކުޑަހުވަދޫ
- ލ. ގަން
- ގދ. ތިނަދޫ
- ފުވައްމުލައް ސިޓީ
މީގެ ކުރިން އާސަންދައިގެ ކައުންޓަރުތައް ގާއިމުކޮށްފައި ހުރީ މާލެ އާއި ހުޅުމާލޭގެ އިތުރުން ފ. ނިލަންދޫ، އައްޑޫ ސިޓީ އަދި ކުޅުދުއްފުށި ސިޓީގައެވެ. ނަމަވެސް މިއަދު ހުޅުވުނު އާ ކައުންޓަރުތަކާއެކު، އަތޮޅުތެރޭގެ ގިނަ ރައްޔިތުންނަށް އެ މީހަކު ދިރިއުޅޭ ސަރަހައްދުން ސީދާ އާސަންދައިގެ މުވައްޒަފުންނާ ބައްދަލުކޮށް ހިދުމަތް ހޯދުމުގެ ފުރުސަތު ވަނީ ފަހިވެފައެވެ.
މިއީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އިރުޝާދުގެ ދަށުން، ސިއްހީ ހިދުމަތްތަކާ ގުޅުންހުރި ކަންކަން ރައްޔިތުންނަށް ލުއިފަސޭހަކޮށްދިނުމަށް ކުރިއަށްގެންދާ މަޝްރޫއެކެވެ. ސަރުކާރުގެ އަމާޒަކީ ރާއްޖޭގެ ހުރިހާ އަތޮޅެއްގެ އާބަން ސެންޓަރުތަކުގައި އާސަންދައިގެ ހިދުމަތްދޭ ކައުންޓަރުތައް ގާއިމުކުރުން ކަމަށް އެ ކުންފުނިން މައުލޫމާތުދެއެވެ.
އާސަންދަ ކޮމްޕެނީ ލިމިޓެޑަކީ ދައުލަތުގެ ބޭސްފަރުވާގެ ނިޒާމުގެ ދަށުން ރައްޔިތުންނަށް އެހީތެރިކަން ފޯރުކޮށްދިނުމަށް 2011 ވަނަ އަހަރު އުފެއްދި ކުންފުންޏެކެވެ.