ދިވެހިރާއްޖޭގެ ޑިޖިޓަލް ޓްރާންސްފޯމޭޝަން އެޖެންޑާ "މޯލްޑިވްސް 2.0" ގެ ދަށުން، ގައުމީ ފެންވަރުގައި ޑިޖިޓަލް އަދި އޭއައި (އާޓިފިޝަލް އިންޓެލިޖެންސް) ހޭލުންތެރިކަން އިތުރުކުރުމަށް ހިންގާ "ޑިޖިޓަލް ފޯރ އޯލް" ކެމްޕޭން މިއަދު ރަސްމީކޮށް އިފްތިތާހުކޮށްފިއެވެ.
މި ކެމްޕޭނަކީ ދިވެހި ކޮންމެ ރައްޔިތަކަށް ވެސް ޑިޖިޓަލް ވަސީލަތްތައް ޔަގީންކަމާއި ރައްކާތެރިކަމާއެކު ބޭނުންކުރަން ދަސްކޮށްދީ، ބާރުވެރިކުރުވުމަށް ފެށި މުހިންމު މަޝްރޫއެކެވެ.
މި ކެމްޕޭން އިފްތިތާހުކޮށްދެއްވީ މިނިސްޓަރ އޮފް އެޑިއުކޭޝަން، ހަޔަރ އެޑިއުކޭޝަން އެންޑް ސްކިލްސް ޑިވެލޮޕްމަންޓް، ޑރ. އިސްމާއީލް ޝަފީއު އެވެ. މި ރަސްމިއްޔާތުގައި ވާހަކަދައްކަވަމުން މިނިސްޓަރު ވިދާޅުވީ، މި މަޝްރޫއުގެ ސަބަބުން ޑިޖިޓަލް ވަސީލަތްތައް ބޭނުންކުރުމުގައި އެހެން މީހުންގެ އެހީތެރިކަމަށް ބަރޯސާވާންޖެހޭ މިންވަރު ކުޑަވެގެންދާނެ ކަމަށް އުއްމީދުކުރައްވާ ކަމަށެވެ. އަދި މިއީ ކުރިއަށް އޮތް ޖީލުތަކަށް ބޭނުންވާ ޒަމާނީ ހުނަރުތައް ފޯރުކޮށްދިނުމަށް އެޅުނު މުހިންމު ފިޔަވަޅެއްކަން އެމަނިކުފާނު ފާހަގަކުރެއްވިއެވެ.
މިނިސްޓްރީ އޮފް ހޯމްލޭންޑް ސެކިއުރިޓީ، ލޭބަރ އެންޑް ޓެކްނޯލޮޖީ އާއި އެޑިއުކޭޝަން މިނިސްޓްރީ ގުޅިގެން ކުރިއަށްގެންދާ މި ކެމްޕޭނުގެ އަމަލީ މަސައްކަތްތައް ހިންގަނީ މައިންޑްކޯގެ ފިއުޗަރ އިންސްޓިޓިއުޓުންނެވެ. މި މަސައްކަތުގައި މައިންޑްކޯ އާއި މޯލްޑިވްސް ޑިޖިޓަލް ސަރވިސަސް އިން ފަންނީ އެހީތެރިކަން ފޯރުކޮށްދޭނެއެވެ. މި ކެމްޕޭނުގެ އަމާޒަކީ 2028 ވަނަ އަހަރުގެ ނިޔަލަށް 225,000 ދިވެހިންނަށް ޑިޖިޓަލް ހުނަރުތައް އުނގަންނައިދިނުމެވެ.
މި ޕްރޮގްރާމަކީ ހުރިހާ އުމުރެއްގެ އަދި ހުރިހާ ދާއިރާއެއްގެ މީހުންނަށް ވެސް ބައިވެރިވެވޭ ގޮތަށް، ދިވެހިބަހުންނާއި އިނގިރޭސިބަހުން ހިލޭ ކުރިއަށްގެންދާ ހަރަކާތެކެވެ. މި ޕްރޮގްރާމްގެ ބައިވެރިންނަށް "ޑިޖިޓަލް ސްކިލްސް ޕާސްޕޯޓް" އެއް ލިބިގެންދާނެއެވެ. މިއީ އެމީހަކު ހާސިލްކުރާ ހުނަރުތަކުގެ ދާއިމީ ރެކޯޑެކެވެ. އަދި މި ކެމްޕޭނުގައި ފެސިލިޓޭޓަރުންގެ ގޮތުގައި ހަރަކާތްތެރިވާ ފަރާތްތައް ބަލައިގަންނާނީ "ޑިޖިޓަލް ޗެމްޕިއަނުން" ގެ ގޮތުގައެވެ.
ހޯމްލޭންޑް ސެކިއުރިޓީ މިނިސްޓަރު އަލީ އިޙްސާން ވިދާޅުވީ، އެންމެ ރަނގަޅު އިންވެސްޓްމަންޓަކީ ހަމައެކަނި ނިޒާމުތަކަށް ކުރާ އިންވެސްޓްމަންޓެއް ނޫން ކަމަށާއި، އެ ނިޒާމުތައް ބޭނުންކުރާނެ މީހުންނަށް ކުރާ އިންވެސްޓްމަންޓް ކަމަށެވެ. ގިނަ ހިދުމަތްތަކެއް އޮންލައިންވަމުންދާ މި ދަނޑިވަޅުގައި، މި ކެމްޕޭނުގެ ސަބަބުން ޑިޖިޓަލް ދުނިޔޭގައި ރައްކާތެރިކަމާއެކު ހަރަކާތްތެރިވުމަށް ބޭނުންވާ ހުނަރުތައް ދިވެހިންނަށް ލިބިގެންދާނެއެވެ.