ވޯލްޑް ޓްރެވަލް އެވޯޑްސް 2026 ގެ ޝަރަފުވެރި ދެ ކެޓަގަރީއަކުން ވެލާނާ އިންޓަރނޭޝަނަލް އެއަރޕޯޓް (ވީ.އައި.އޭ) އާއި މާމަހި އެގްޒެކެޓިވް ލައުންޖް ނޮމިނޭޓްވެފައިވާކަން މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމް.އޭ.ސީ.އެލް) އިން މިއަދު އިޢުލާނުކޮށްފިއެވެ.
މިއީ ބައިނަލްއަޤްވާމީ ފެންވަރުގައި ރާއްޖޭގެ ވައިގެ ދަތުރުފަތުރުގެ ދާއިރާގެ ޚިދުމަތްތައް ބަލައިގަންނަކަން ހާމަވާ ކަމެކެވެ.
ވެލާނާ އިންޓަރނޭޝަނަލް އެއަރޕޯޓް ނޮމިނޭޓްވެފައިވަނީ "އިންޑިއަން އޯޝަންސް ލީޑިންގ އެއަރޕޯޓް 2026" ގެ މަޤާމަށެވެ. ފާހަގަކޮށްލެވޭ ގޮތުގައި، މީގެ ކުރިން 12 ފަހަރު މި ޝަރަފުވެރި ލަޤަބު ވީ.އައި.އޭ އިން ވަނީ ކާމިޔާބުކޮށްފައެވެ. މިފަހަރުގެ ނޮމިނޭޝަނަކީ އިންޑިއާ ކަނޑުގެ ސަރަޙައްދުގައި ފާހަގަކޮށްލެވޭ އެންމެ ކުރިއަރާފައިވާ އެއް އެއަރޕޯޓުގެ ގޮތުގައި ވީ.އައި.އޭ އިން ދަމަހައްޓަމުންދާ މަޤާމާއި، ދެމުންދާ ޚިދުމަތްތަކުގެ ފެންވަރު ރަމްޒުކޮށްދޭ ކަމެއް ކަމަށް އެމް.އޭ.ސީ.އެލް އިން ބުނެއެވެ.
މީގެ އިތުރުން، އެއަރޕޯޓުން ދަތުރުކުރާ ފަސިންޖަރުންނަށް ފެންވަރު ރަނގަޅު އަދި އަރާމު ޚިދުމަތްތަކެއް ފޯރުކޮށްދިނުމަށް ކުރަމުންދާ މަސައްކަތްތަކުގެ ދަށުން، މާމަހި އެގްޒެކެޓިވް ލައުންޖް ވަނީ "އިންޑިއަން އޯޝަންސް ލީޑިންގ އެއަރޕޯޓް ލައުންޖް 2026" ގެ މަޤާމަށް ނޮމިނޭޓްވެފައެވެ. މިއީ އެ ލައުންޖުން ފޯރުކޮށްދޭ ޕްރީމިއަމް ޚިދުމަތްތަކަށް ލިބުނު ބޮޑު ބަލައިގަތުމެކެވެ.
1993 ވަނަ އަހަރު އުފެދުނު ވޯލްޑް ޓްރެވަލް އެވޯޑްސްއަކީ ދަތުރުފަތުރާއި، ފަތުރުވެރިކަމުގެ ދާއިރާގައި ދުނިޔޭގެ ފެންވަރުގައި ދެވޭ އެންމެ ޝަރަފުވެރި އެއް އެވޯޑެވެ. މި އެވޯޑަށް ވޯޓު ދިނުމުގެ ފުރުޞަތު މިހާރު ވަނީ ހުޅުވާލާފައެވެ. މި ނޮމިނޭޝަންތަކަކީ އެއަރޕޯޓުގެ ޚިދުމަތްތައް އިތުރަށް ތަރައްޤީކޮށް، ފަސިންޖަރުންގެ ތަޖުރިބާ ފުރިހަމަކުރުމަށާއި، ރާއްޖޭގެ މައި ދޮރާށީގެ ގޮތުގައި ވީ.އައި.އޭ ގެ މަޤާމު ވަރުގަދަކުރުމަށް އެމް.އޭ.ސީ.އެލް އިން ކުރަމުންދާ މެދުނުކެނޑި މަސައްކަތްތަކުގެ ނަތީޖާއެވެ.
ވޯޓު ދެއްވުމަށް:
ވެލާނާ އިންޓަރނޭޝަނަލް އެއަރޕޯޓް – އިންޑިއަން އޯޝަންސް ލީޑިންގ އެއަރޕޯޓް 2026
https://www.worldtravelawards.com/vote-for-velana-international-airport-maldives-2026
މާމަހި އެގްޒެކެޓިވް ލައުންޖް – އިންޑިއަން އޯޝަންސް ލީޑިންގ އެއަރޕޯޓް ލައުންޖް 2026
https://www.worldtravelawards.com/vote-for-maamahi-executive-lounge-maldives-2026