ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި އެމަނިކުފާނުގެ އަނބިކަނބަލުން ފަސްޓް ލޭޑީ ސާޖިދާ މުޙައްމަދު، ރަސްމީ ދަތުރުފުޅެއްގައި މިއަދު ހެނދުނު އއ. އުކުޅަހަށް ވަޑައިގެންފިއެވެ. ރައީސުލްޖުމްހޫރިއްޔާގެ ދެކަނބަލުން އެރަށަށް ފައިބައިވަޑައިގަތުމުން، ރަށުގެ ބަނދަރު ސަރަޙައްދުން ވަނީ ވަރަށް ހޫނު އަދި ކުލަގަދަ މަރުޙަބާއެއް ދަންނަވާފައެވެ.
މި ދަތުރުފުޅަކީ އުކުޅަހުގައި ބޭއްވުމަށް ހަމަޖެހިފައިވާ ބައިނަލްއަޤްވާމީ ދެ ބައްދަލުވުމެއްގައި ބައިވެރިވެވަޑައިގަތުމަށް ކުރައްވާ ދަތުރުފުޅެކެވެ. އެގޮތުން، ސިޑްސް ސުޕްރީމް އޮޑިޓް އިންސްޓިޓިއުޝަންސް (އެސް.އޭ.އައި) ސިމްޕޯސިއަމް ނިންމުމުގެ ރަސްމިއްޔާތާއި، އައި.ޑީ.އައި ގްލޯބަލް ސަމިޓް ހުޅުވުމުގެ ރަސްމިއްޔާތުގައި ރައީސުލްޖުމްހޫރިއްޔާ ބައިވެރިވެވަޑައިގަންނަވާނެއެވެ.
ރައީސުލްޖުމްހޫރިއްޔާގެ ދެކަނބަލުންނަށް މަރުޙަބާ ދެންނެވުމަށްޓަކައި އުކުޅަހުގެ ގިނަ އަދަދެއްގެ ރައްޔިތުން ވަނީ ބަނދަރު ސަރަޙައްދަށް ޖަމާވެފައެވެ. މި އިސްތިޤްބާލުގައި ރަތްދޫލައިގެ މަރުޙަބާއެއް ދަންނަވާފައިވާއިރު، ސަރުކާރުގެ ވަޒީރުންނާއި ރައްޔިތުންގެ މަޖިލީހުގެ މެންބަރުންގެ އިތުރުން ދައުލަތުގެ އިސް ބައެއް ވެރިންވެސް މި ދަތުރުފުޅުގައި ބައިވެރިވެވަޑައިގަންނަވައެވެ.
މި ދަތުރުފުޅުގެ ތެރެއިން، އުކުޅަހުގައި ސަރުކާރުން ކުރިއަށްގެންދާ ތަރައްޤީގެ މަޝްރޫޢުތަކުގެ އެންމެ ފަހުގެ މަޢުލޫމާތު އޮޅުންފިލުއްވައި، ބައެއް މަޝްރޫޢުތަކުގެ އަމަލީ މަސައްކަތް ރައީސުލްޖުމްހޫރިއްޔާ ފަށްޓަވައިދެއްވުމަށް ވަނީ ހަމަޖެހިފައެވެ. މިއީ ރަށުގެ ތަރައްޤީއަށް ކުރެވޭ މަސައްކަތްތައް ގާތުން ބައްލަވާލެއްވުމަށް ލިބޭ ފުރުޞަތެއް ކަމަށް ސަރުކާރުން ހާމަކުރެއެވެ.