ކަނޑުމަތީގެ ހާދިސާގައި ގެއްލުނު ތިން މީހުން ހޯދުމަށް ވައިގެ މަގުން ބޮޑު ސަރަހައްދެއް ބަލައިފި

ފޮޓޯ: ސޯޝަލް މީޑިއާ
ފޮޓޯ: ސޯޝަލް މީޑިއާ

ހުވަދު އަތޮޅަށް ހިލައާއި ހިލަވެލި ބަރުކޮށްގެން ދަތުރުކުރަނިކޮށް އަޑިއަށްދިޔަ "ފްރެންޑް 4" ދޯނިން ގެއްލުނު ތިން މީހުން ހޯދުމުގެ މަސައްކަތް މޯލްޑިވްސް ނެޝެނަލް ޑިފެންސް ފޯސް (އެމްއެންޑީއެފް) އިން ހުއްޓުމެއް ނެތި ކުރިއަށް އެބަގެންދެއެވެ. މި ހާދިސާގައި ގެއްލުނު މީހުން ހޯދުމަށް މިހާތަނަށް ވައިގެ މަގުން 5،212 އަކަ ނޯޓިކަލް މޭލުގެ ސަރަހައްދެއް ބަލާފައިވާ ކަމަށް އެމްއެންޑީއެފް އިން މިއަދު ވަނީ ހާމަކޮށްފައެވެ.

މި ހާދިސާގައި ގެއްލިގެން ހޯދަމުންދަނީ ނ. މަނަދުއަށް ނިސްބަތްވާ ސާޖަންޓް އަލީ ނާފިއުއާއި، އެމްއެންޑީއެފްގެ ސްޓާފް ސާޖަންޓް އިބްރާހިމް އަހުމަދުގެ އިތުރުން، އެ ދޯނީގެ ކައްޕި ތ. މަޑިފުއްޓަށް އުފަން މުހައްމަދު ހަމްދޫނެވެ. މި ތިން މީހުން ގެއްލުނީ ދޯނި އަޑިއަށްދިޔަ ވަގުތު މީހުން ސަލާމަތްކުރުމުގެ މަސައްކަތުގައި އުޅެނިކޮށް ކަމަށް މައުލޫމާތު ލިބެއެވެ. ދޯނީގައި ތިބި އަށް މީހުންގެ ތެރެއިން ހަތް މީހަކު ވަނީ ސަލާމަތް ކުރެވިފައެވެ.

އެމްއެންޑީއެފް އިން ބުނި ގޮތުގައި ވައިގެ މަގުން ބެލި ސަރަހައްދުގެ އިތުރުން، ކަނޑުމަގުން 1،070.10 ނޯޓިކަލް މޭލުގެ ސަރަހައްދެއްވެސް މިހާރު ވަނީ ބަލާފައެވެ. މި ހޯދުމުގެ މަސައްކަތުގައި ޔޫއޭވީ ނުވަތަ ޑްރޯންގެ އިތުރުން މޯލްޑިވިއަންގެ ފްލައިޓެއްވެސް ދަނީ ބޭނުންކުރަމުންނެވެ. ނަމަވެސް، މިހާތަނަށް ކުރެވުނު އެއްވެސް މަސައްކަތަކުން އެ މީހުންގެ އެއްވެސް ނިޝާނެއް ފެނިފައެއް ނުވެއެވެ.

މި ދުވަސްވަރަކީ ކަނޑުމަތީގެ ހާދިސާތައް ގިނަ ދުވަސްވަރަކަށް ވާތީ، ދަތުރުފަތުރު ކުރާ ފަރާތްތަކުން މޫސުމަށް ސަމާލުވުމަށާއި، ސަލާމަތީ ފިޔަވަޅުތައް ވަރުގަދަކުރުމަށް ކަމާބެހޭ އިދާރާތަކުން ވަނީ އިލްތިމާސްކޮށްފައެވެ. ގެއްލުނު މީހުން ފެންނާނެ ކަމުގެ އުންމީދުގައި އާއިލާތަކުންނާއި އާންމުން ދަނީ ހެޔޮ ދުއާ ކުރަމުންނެވެ.

ގުޅުންހުރި ލިޔުންތައް
ހިޔާލު ފާޅުކުރައްވާ!
ފަހުގެ