މިނިސްޓްރީ އޮފް ހޯމްލޭންޑް ސެކިއުރިޓީ، ލޭބަރ އެންޑް ޓެކްނޯލޮޖީގެ ސްޓޭޓް މިނިސްޓަރުގެ މަގާމުގައި ހުންނެވި ޑރ. އަބްދުﷲ ފައިރޫޝް މިއަދު އެ މަގާމުން އިސްތިއުފާ ދެއްވައިފިއެވެ.
ފައިރޫޝް މަގާމުން އިސްތިއުފާ ދެއްވިކަން ހާމަކުރެއްވީ ސޯޝަލް މީޑިއާގައި ކުރެއްވި ޕޯސްޓެއްގައެވެ. އޭނާ ވިދާޅުވި ގޮތުގައި މި ނިންމުމަކީ ވަރަށް ބޮޑަށް ވިސްނެވުމަށްފަހު ނިންމެވި ނިންމުމެކެވެ. އަދި މިއީ އާންމު ހިދުމަތުގެ މި ބާބު ނިންމާލުމަށް އެންމެ އެކަށީގެންވާ ވަގުތު ކަމަށް ގަބޫލުކުރައްވާ ކަމަށް ވެސް އޭނާ ވިދާޅުވިއެވެ. މީގެ އިތުރުން، ހިދުމަތް ކުރުމަށް ލިބުނު ފުރުސަތަށްޓަކައި ޝުކުރު އަދާކުރައްވައި، އެކުގައި މަސައްކަތް ކުރެއްވި މުވައްޒަފުންނާއި މުއައްސަސާތަކަށް އޭނާ ވަނީ ތައުރީފު ކުރައްވާފައެވެ.
މި ސަރުކާރުގައި ފައިރޫޝް އެންމެ ފުރަތަމަ ހުންނެވީ ހަޔާ އެޑިއުކޭޝަން މިނިސްޓްރީގެ ސްޓޭޓް މިނިސްޓަރުގެ މަގާމުގައެވެ. އޭނާ ހޯމްލޭންޑް ސެކިއުރިޓީ މިނިސްޓްރީއަށް ބަދަލުކުރެއްވީ 16 އޮކްޓޫބަރު 2024 ގައެވެ. ސަރުކާރުގެ ސިޔާސީ މަގާމަކާ ހަވާލުވެވަޑައިގަތުމުގެ ކުރިން ފައިރޫޝް ވަނީ މޯލްޑިވްސް ޕޮލިސް ސާވިސްގައި 20 އަހަރު ދުވަހު ހިދުމަތް ކުރައްވާފައެވެ. ފުލުހުންގެ އިދާރާގައި އެސިސްޓެންޓް ކޮމިޝަނާ އޮފް ޕޮލިސްގެ މަގާމުގައި ހުންނެވުމަށްފަހު، އޭނާ ޝަރަފުވެރިކަމާއެކު ރިޓަޔާ ކުރެއްވީ 2021 ވަނަ އަހަރުއެވެ.
ނަމަވެސް، ފައިރޫޝް ޝަރަފުވެރިކަމާއެކު ރިޓަޔާ ކުރެއްވުމަކީ ބަލައިގަނެވޭނެ ކަމެއް ނޫން ކަމަށް އޭރުގެ ރައްޔިތުންގެ މަޖިލީހުން ވަނީ ނިންމާފައެވެ. އެއީ 7 ފެބްރުއަރީ 2012 ގައި ކުރީގެ ރައީސް މުހައްމަދު ނަޝީދުގެ ވެރިކަން ނިމުމަކަށް އައިއިރު ހިނގައިދިޔަ ހަމަނުޖެހުންތަކުގައި ފައިރޫޝް އިސް ދައުރެއް އަދާކުރެއްވި ކަމަށް ކުރެވުނު ތުހުމަތުތަކާ ގުޅިގެންނެވެ. އެ ދުވަހު ފުލުހުންގެ އިދާރާއާ ވަގުތީ ގޮތުން ހަވާލުވެވަޑައިގަތީ ވެސް އޭނާއެވެ. މި މައްސަލަ އޭރު މަޖިލީހުގެ 241 ކޮމިޓީން ވެސް ވަނީ ބަލާފައެވެ.