މީގެ ހަތަރު އަހަރު ކުރިން މާލޭގެ ގެއެއްގެ ތެރޭގައި އަނިޔާވެރި ގޮތަކަށް މަރާލާފައި އޮއްވާ ފެނުނު ޝިއާއު މުހައްމަދު ސައީދުގެ މަރުގެ މައްސަލައިގައި، ދައުވާ ލިބޭ އަލީ ޝާހިލްގެ މައްޗަށް ހިންގި ޝަރީއަތުގެ އަޑުއެހުންތައް ކްރިމިނަލް ކޯޓުން ނިންމާލައިފިއެވެ. މި މައްސަލައިގެ އެންމެ ފަހު އަޑުއެހުން މިދިޔަ ހަފުތާގައި ބާއްވާފައިވަނީ ހުލާސާ ބަޔާން އިއްވުމަށެވެ.
ފުވައްމުލަކަށް ނިސްބަތްވާ ޝިއާއު މަރާލި މައްސަލައިގައި ފ. ނިލަންދޫ، ފިނިފެންމާގޭ ޝާހިލްގެ މައްޗަށް ދައުލަތުން ފަސް ދައުވާއެއް އުފުލާފައިވެއެވެ. ނަމަވެސް، މައްސަލައިގެ ނާޒުކުކަމަށް ރިއާޔަތްކޮށް، މި ޝަރީއަތުގެ އަޑުއެހުންތައް ކުރިއަށް ގެންގޮސްފައިވަނީ އާންމުންނަށް ނުވަދެވޭ ގޮތަށް ސިއްރުކޮށްގެންނެވެ. މީގެ އިތުރުން، އޭނާގެ މައްޗަށް ކުރި ބައެއް ދައުވާތަކުގެ ބާވަތްވެސް ކޯޓުން ވަނީ ސިއްރުކޮށްފައެވެ.
ޝިއާއު މަރާލާފައި އޮއްވާ ފެނުނީ 2022 ވަނަ އަހަރުގެ އޯގަސްޓް މަހުގެ ހަވަނަ ދުވަހުގެ ރޭ ހ. ޝީރީންވިލާގެ އެޕާޓްމަންޓެއްގެ ތެރެއިންނެވެ. ފުލުހުންގެ ތަހުގީގުންނާއި ޕޯސްޓްމޯޓަމް ރިޕޯޓުން ހާމަވެފައިވާ ގޮތުގައި، ޝިއާއު މަރާލުމަށްފަހުވެސް އޭނާގެ ހަށިގަނޑަށް ބޮޑެތި އަނިޔާތަކެއް ދީފައިވެއެވެ. ޝާހިލް ހައްޔަރުކުރީ އެ ހާދިސާ ހިނގި ތަނުން ކަމަށްވީ ނަމަވެސް، ތަހުގީގަށާއި ޝަރީއަތަށް އޭނާގެ ފަރާތުން އެއްބާރުލުން ލިބިފައި ނުވާކަން ފާހަގަކުރެވެއެވެ.
ޝަރީއަތުގެ މަރުހަލާގައި ވަކީލުންނާ ވާހަކަދައްކަން އިންކާރު ކުރުމުގެ ސަބަބުން، ފަހުން މި މައްސަލަ ކުރިއަށް ގެންގޮސްފައިވަނީ އޭނާގެ ދިފާއީ ވަކީލަކާ ނުލައެވެ. މިހާރު މައްސަލައިގެ އަޑުއެހުންތައް ނިމިފައިވާއިރު، ދެން އޮންނާނީ ޝާހިލްގެ މައްޗަށް ކުށް ސާބިތުވޭތޯ ކަނޑައެޅުމާއި، ކުށް ސާބިތުވާނަމަ އަދަބު ކަނޑައެޅުމުގެ މަޖިލީހެވެ. ޝާހިލް މިހާރުވެސް ހުރީ ޝަރީއަތް ނިމެންދެން ބަންދުގައެވެ.