މާލޭގެ ގެއެއްގައި މިއަދު ފަތިހު ގޭސްފުޅިއެއް ގޮވައި ހިނގި ނުރައްކާތެރި އަލިފާނުގެ ހާދިސާއެއްގައި ހަތަރު މީހަކަށް އަނިޔާވެއްޖެއެވެ. ފުލުހުން ބުނި ގޮތުގައި މި ހާދިސާ ހިނގާފައިވަނީ ގ. ދޫގަސްގޭގައެވެ. މި ހާދިސާގެ ރިޕޯޓް ފުލުހުންނަށް ލިބިފައިވަނީ މިއަދު ފަތިހު 5:27 ހާއިރުއެވެ.
މި ހާދިސާގައި އަނިޔާވި ހަތަރު މީހުންނަށް މިހާރު އަންނަނީ އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގައި ފަރުވާ ދެމުންނެވެ. އަނިޔާވި މީހުންގެ ތެރޭގައި ހިމެނެނީ ބަންގްލަދޭޝްގެ ދެ މީހަކާއި އިންޑިއާގެ ދެ މީހުންނެވެ. ފުލުހުން މައުލޫމާތު ދޭ ގޮތުގައި މީގެ ތެރެއިން ދެ މީހެއްގެ ހާލު ސީރިއަސްއެވެ. ނަމަވެސް އެ މީހުންނަށް ލިބިފައިވާ އަނިޔާތަކުގެ ތަފްސީލެއް އަދި ހާމައެއް ނުކުރެއެވެ.
މައުލޫމާތު ލިބިފައިވާ ގޮތުގައި މި ހާދިސާ ހިނގި އެޕާޓްމަންޓަކީ ފަސް ކޮޓަރި ހިމެނޭ، ގާތްގަނޑަކަށް 15 މީހުން ދިރިއުޅެމުންދިޔަ ތަނެކެވެ. ގޭސްފުޅި ގޮވުމާ ގުޅިގެން ރޯވި އަލިފާންގަނޑު އެމްއެންޑީއެފްގެ ފަޔަރ އެންޑް ރެސްކިއު ސަރވިސްއިން ވަނީ ކޮންޓްރޯލްކޮށްފައެވެ.
މި ހާދިސާއާ ގުޅިގެން ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) ގެ ޓީމަކުން ވެސް ދަނީ އެ ސަރަހައްދުގައި ހަރަކާތްތެރިވަމުންނެވެ. ފުލުހުން ބުނީ މި ހާދިސާ ހިނގަން މެދުވެރިވި ސަބަބު އިތުރަށް ތަހުގީގު ކުރަމުންދާ ކަމަށެވެ. މާލޭގައި މީގެ ކުރިން ވެސް މިފަދަ ނުރައްކާތެރި އަލިފާނުގެ ހާދިސާތައް ހިނގާފައިވާކަން ފާހަގަކުރެވެއެވެ.