އިސްލާމީ ކަންތައްތަކާ ބެހޭ ވުޒާރާއިން ކުރިއަށްގެންދާ ޒުވާން ޚަޠީބުން ތަމްރީނުކުރުމުގެ ޕްރޮގްރާމުގެ ފަސްވަނަ ބުރު ނިންމައި، އިތުރު 91 ޒުވާނަކު މިއަދު ދަސްވެނިވެއްޖެއެވެ. މި ކުދިންނަށް ސަނަދު ހަވާލުކުރުމަށް ބޭއްވި ހާއްސަ ރަސްމިއްޔާތު އޮތީ މިއަދު އިސްލާމީ މަރުކަޒުގައެވެ.
މިއަދު ދަސްވެނިވި 91 ޚަޠީބުންނާއެކު، 2024 ވަނަ އަހަރު ފެށި މި ޕްރޮގްރާމުގެ ފަސް ބުރުން މިހާތަނަށް ޖުމްލަ 712 ޒުވާނުން ވަނީ ތަމްރީނު ފުރިހަމަކޮށްފައެވެ. އިސްލާމީ ކަންތައްތަކާ ބެހޭ ވުޒާރާއިން ބުނި ގޮތުގައި، މި ޕްރޮގްރާމުގެ މައިގަނޑު މަގުސަދަކީ ރާއްޖޭގެ އެކި ރަށްރަށުގައި ހުކުރު ކުރުމާއި ހުތުބާ ކިޔާނެ ޚަޠީބުން ނެތުމުގެ ސަބަބުން ދިމާވާ ދަތިތަކަށް ދާއިމީ ހައްލެއް ހޯދައިދިނުމެވެ. މީގެ އިތުރުން، މިއީ ދީނީ ދާއިރާއިން ޒުވާނުންނަށް ފުރުސަތުތައް ފަހިކޮށްދިނުމަށް ކުރިއަށްގެންދާ މުހިންމު މަސައްކަތެކެވެ.
މި ތަމްރީނު ޕްރޮގްރާމުގައި ބައިވެރިވުމުގެ ފުރުސަތު ހުޅުވާލާފައިވަނީ ގްރޭޑް 10، 11 އަދި 12 އެއްގައި ތައުލީމު ހާސިލުކުރަމުންދާ ދަރިވަރުންނަށާއި، ސްކޫލް ނިމިފައިވާ 18 އަހަރުން ދަށުގެ ކުދިންނަށެވެ. އުމުރުން 18 އަހަރު ނުފުރޭ ކުދިން މި ޕްރޮގްރާމުގައި ބައިވެރިވަނީ ބެލެނިވެރިޔާގެ ހުއްދައާއެކުގައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ އަމާޒަކީ މި ރިޔާސީ ދައުރުގެ ތެރޭގައި ޖުމްލަ 1،000 ޒުވާން ޚަޠީބުން ތަމްރީނުކޮށް މުޖުތަމައަށް ނެރުމެވެ. މި އަމާޒަށް ވާސިލުވުމަށްޓަކައި ސަރުކާރުން އަންނަނީ މެދުކެނޑުމެއްނެތި މި ޕްރޮގްރާމުގެ އެކި ބުރުތައް ރާވާ ހިންގަމުންނެވެ. މި ޕްރޮގްރާމަކީ ޒުވާނުންގެ މެދުގައި ބޮޑު މަގުބޫލުކަމެއް ލިބިފައިވާ ކާމިޔާބު މަސައްކަތެއްގެ ގޮތުގައި އެ ވުޒާރާއިން ފާހަގަކުރެއެވެ.