ދިވެހިރާއްޖޭގެ ތާރީޚުގައިވެސް ބޭރުގެ ފަރާތަކުން ހިންގުމަށް ހުށަހަޅާފައިވާ އެންމެ ބޮޑު އިންވެސްޓްމަންޓް ކަމަށްވާ، 20 ބިލިއަން އެމެރިކާ ޑޮލަރު (ގާތްގަނޑަކަށް 308 ބިލިއަން ދިވެހި ރުފިޔާ) ގެ ބިޔަ މަޝްރޫއެއް ރަސްމާލޭގައި ތަރައްގީކުރުމަށް އަބޫދާބީގެ މަޝްހޫރު ޑިވެލޮޕަރު "އީގަލް ހިލްސް" އާއެކު ދިވެހި ސަރުކާރުން ތާރީޚީ އެއްބަސްވުމެއްގައި ސޮއިކޮށްފިއެވެ.
މި ބިޔަ ވޯޓަރފްރަންޓް އަދި މެރީނާ މަޝްރޫއުގެ އެއްބަސްވުމުގައި ސޮއިކުރުމުގެ ރަސްމިއްޔާތު ބާއްވާފައިވަނީ ދުބާއީގައެވެ. މި ރަސްމިއްޔާތުގައި އީގަލް ހިލްސްގެ ބާނީ އަދި ޗެއާމަން މުހައްމަދު ޢަލީ އަލްޢައްބާރުގެ އިތުރުން ދިވެހި ސަރުކާރުގެ އިސް ވެރިން ބައިވެރިވެވަޑައިގެންނެވިއެވެ.
މި މަޝްރޫއު ކުރިއަށްގެންދިއުމަށް ހަމަޖެހިފައިވަނީ މާލެއިން ފުރައިގެން ލޯންޗުގައި ގާތްގަނޑަކަށް 17 މިނެޓުން ދެވޭ ރާސްތާގައި އޮތް ފުށިދިއްގަރުފަޅު ހިއްކައިގެން ބިނާކުރާ "ރަސްމާލެ" ގައެވެ. ރަސްމާލެއަކީ މާލެ ސަރަހައްދުގެ ތޮއްޖެހުން ހައްލުކުރުމަށްޓަކައި 1،100 އަށްވުރެ ގިނަ ހެކްޓަރުގެ ބިން ހިއްކައި، 65،000 ހައުސިން ޔުނިޓާއެކު ޒަމާނީ ފެންވަރަށް ތަރައްގީކުރަމުން އަންނަ އީކޯ-ސިޓީއެކެވެ.
"ދަ މޯލްޑިވްސް ވޯޓަރފްރަންޓް އެންޑް މެރީނާ" ގެ ނަމުގައި ކުރިއަށްގެންދާ މި އިންޓަގްރޭޓެޑް މަޝްރޫއުގެ ދަށުން ބައިނަލްއަގްވާމީ ފެންވަރުގެ ހޮޓާތަކާއި ރިޒޯޓުތަކާއި، އަގުބޮޑު ބްރޭންޑެޑް ރެޒިޑެންސްތަކާއި، ދުނިޔޭގެ ފެންވަރުގެ މެރީނާއެއް ގާއިމުކުރާނެއެވެ. މީގެ އިތުރުން ހިނގާ މަގުތަކާއި، ރެސްޓޯރެންޓްތަކާއި، ފިހާރަތަކުގެ އިތުރުން މަތީ ފެންވަރުގެ ވެލްނަސް ސެންޓަރުތައް ވެސް މި މަޝްރޫއުގެ ތެރޭގައި ހިމެނެއެވެ.
އީގަލް ހިލްސްއިން މައުލޫމާތު ދޭ ގޮތުގައި ފިޔަވަހިތަކަކަށް ބަހާލައިގެން ކުރިއަށްގެންދާ މި މަޝްރޫއުގެ ސަބަބުން ރާއްޖޭގައި 54،000 އަށްވުރެ ގިނަ ވަޒީފާގެ ފުރުސަތު އުފެދިގެންދާނެއެވެ. އަދި މަޝްރޫއު އެއްކޮށް ފުރިހަމަވުމުން އަހަރަކު އެއް މިލިއަނަށްވުރެ ގިނަ ފަތުރުވެރިން ޒިޔާރަތްކޮށް، ފަތުރުވެރިކަމުގެ ދާއިރާއިން އަހަރަކު ދެ ބިލިއަން ޑޮލަރުގެ އާމްދަނީއެއް ލިބޭނެ ކަމަށް ލަފާކުރެވެއެވެ. މީގެ އިތުރުން މި މަޝްރޫއުގެ މުޅި މުއްދަތުގައި 30 ބިލިއަން ޑޮލަރަށްވުރެ ބޮޑު ބޭރުގެ އިންވެސްޓްމަންޓް ގައުމުގެ އިގްތިސާދަށް ވަންނާނެ ކަމަށް އަންދާޒާކުރެވެއެވެ.
މި މަޝްރޫއު ހިންގާ އީގަލް ހިލްސްއަކީ ދުނިޔޭގެ އެންމެ އުސް އިމާރާތް ކަމަށްވާ ބުރުޖު ހަލީފާ އަދި މަޝްހޫރު ދުބާއީ މޯލް ތަރައްގީކުރި އެމާރ ޕްރޮޕަޓީސްގެ ބާނީ މުހައްމަދު އަލާ އައްބާރުގެ އަމިއްލަ ކުންފުންޏެކެވެ. މި ކުންފުނިން ދަނީ އަބޫދާބީގެ ލުލު އައިލެންޑާއި، އަލްބޭނިއާ އަދި ޝާރްޖާ ފަދަ ދުނިޔޭގެ ފާހަގަކޮށްލެވޭ އެތައް ގައުމެއްގައި ބިޔަ ވޯޓަރފްރަންޓް މަޝްރޫއުތައް ހިންގަމުންނެވެ.
މީގެ އިތުރުން މާލޭގައި 8.8 ބިލިއަން ޑޮލަރުގެ މާލީ މަރުކަޒެއް ނުވަތަ ފައިނޭންޝަލް ސެންޓަރެއް ގާއިމުކުރުމަށްޓަކައި ދުބާއީގެ އެމް.ބީ.އެސް ގްލޯބަލް އިންވެސްޓްމަންޓްސް އާއެކު ވެސް ދިވެހި ސަރުކާރުން ދާދިފަހުން ވަނީ މަސައްކަތް ފަށާފައެވެ.