ދިވެހި ވަޠަނީ ޚިދުމަތުގެ ފަންނީ ތަމްރީނު ޕްރޮގްރާމްގެ ދެވަނަ ބުރު ފުރިހަމަކޮށް، އިތުރު 73 ދަރިވަރަކު މިއަދު ދަސްވެނިވެއްޖެއެވެ. މިއީ ޤައުމީ ޚިދުމަތުގެ އިނީޝިއަލް ޓްރެއިނިންގ ނިންމާ ކުދިންނަށް ޚާއްޞަކޮށްގެން ކުރިއަށްގެންދާ ފަންނީ ތަމްރީނުތަކެކެވެ.
މިއަހަރުގެ ޖޫން މަހުގެ 3 ވަނަ ދުވަހުން ފެށިގެން 16 ހަފުތާގެ މުއްދަތަށް ކުރިއަށްގެންދިޔަ މި ތަމްރީނު ޕްރޮގްރާމްގައި ރާއްޖޭގެ 17 އަތޮޅަކުން 75 ދަރިވަރުން ބައިވެރިވިއެވެ. އޭގެ ތެރެއިން ކޯސް ފުރިހަމަކުރި 73 ދަރިވަރުންގެ ތެރޭގައި ހިމެނެނީ 60 ފިރިހެން ކުދިންނާއި 13 އަންހެން ކުދިންނެވެ. މި ޕްރޮގްރާމްގެ ދަށުން ދަރިވަރުންނަށް ކިޔަވައިދީފައިވަނީ އެކި ދާއިރާތަކުން ފަންނީ ތަޖުރިބާ ލިބިފައިވާ ސިފައިންގެ މުދައްރިބުންނެވެ.
މި ތަމްރީނުތަކުގެ ތެރޭގައި އޮޓޯމޯބައިލް އިންޖިނިއަރިންގ، މެރިން އިންޖިނިއަރިންގ، އިލެކްޓްރީޝަން، ރެފްރިޖަރޭޝަން އެންޑް އެއަރކޮންޑިޝަނިންގ، ވެލްޑިންގ، މެޓަލް ފެބްރިކޭޝަން އަދި އޮފީސް މެނޭޖްމަންޓް ފަދަ ސިނާޢީ މުހިންމު ދާއިރާތަކުން ފަންނީ ހުނަރުތައް ދަސްކޮށްދީފައިވެއެވެ. މި ޕްރޮގްރާމް ކާމިޔާބުކަމާއެކު ނިންމާލި ދަރިވަރުންނަށް މޯލްޑިވްސް ކޮލިފިކޭޝަންސް އޮތޯރިޓީ (އެމްކިއުއޭ) ޤަބޫލުކުރާ ލެވެލް 3 ގެ ސެޓިފިކެޓެއް ލިބޭނެއެވެ.
ވޭތުވެދިޔަ 9 މަސްދުވަހުގެ ތެރޭގައި މި ފަންނީ ތަމްރީނުތަކުން ޖުމްލަ 136 ޒުވާނުން ދަސްވެނިވެފައިވާއިރު، މި ޕްރޮގްރާމްގެ ތިންވަނަ ބެޗްގެ ކިޔެވުން މި ހިނގާ އޮކްޓޫބަރު މަހުގެ 12 ވަނަ ދުވަހު ފެށުމަށް ވަނީ ތައްޔާރުވެފައެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިސްނަންގަވައިގެން ފެއްޓެވި މި މަޝްރޫޢުގެ ދަށުން، ކުރިއަށް އޮތް ތަނުގައި އިތުރު ފަންނީ ދާއިރާތަކާއި އިންޓަރންޝިޕް ފުރުޞަތުތައް ތަޢާރަފްކުރަން ސަރުކާރުން ވަނީ ނިންމާފައެވެ. މި ޕްރޮގްރާމަކީ ޒުވާނުންގެ މެދުގައި ޤައުމީ ރޫޙާއި އިސްލާމީ އަޚްލާޤު އަށަގަންނުވައި، ޤައުމަށް ޚިދުމަތްކުރާނެ ހުނަރުވެރި ޖީލެއް ބިނާކުރުމަށް ހިންގާ މުހިންމު ހަރަކާތެކެވެ.