މުޅި ރާއްޖެއިން މި ހުސްވި ހަފްތާގައި މަސްވެރިކަން އެންމެ ރަނގަޅީ ހުވަދު އަތޮޅަށް ކަމަށް މިފްކޯއިން ބުނެފިއެވެ.
މިފްކޯއިން ބުނީ މި ހަފްތާގައި އެވްރެޖްކޮށް ކޮންމެ ދުވަހަކު 230 ޓަނާއި 250 ޓަނާ ދެމެދުގެ އަދަދަކަށް އެކުންފުންޏަށް މަސް ލިބިފައިވާކަމަށެވެ. މިއީ ރަނގަޅު އަދަދެއްކަމަށް އެކުންފުނިން ބުނެއެވެ. އިއްޔަ އެކަނިވެސް ތިނަދޫ ބަނދަރުން 80 ޓަނުގެ މަސް ލިބުނު ކަމަށް މިފްކޯއިން ބުނެއެވެ.
ތިނަދޫގެ ހުޅަނގުން ބޭރުން އިއްޔަ ބައެއް ދޯނިފަހަރުން 10 ޓަނާއި 18 ޓަނާ ދޭތެރޭ އަދަދަކަށް މަސް ބޭނިކަމަށް މަސްދޯނިފަހަރުން ބުނެއެވެ. މިހަފްތާގައި ހުވަދު އަތޮޅުގެ ބައެއް ދޯނިފަހަރުން ވަނީ މުޅި ހަފްތާއިން 50 ޓަނަށް ވުރެ ގިނައިން ބާނާފައެވެ.
މަސްވެރިން ބުނީ މި ހަފްތާގައި ގދ. ތިނަދޫގެ ހުޅަނގުން ގިނައިން މަސް އައިން ފެނުނު ކަމަށެވެ. މިގޮތަށް މަސް ފެނުމަކީ މަސްވެރިކަން ރަނގަޅުވުމުގެ އަމާލާތެއް މަސްވެރިން ބުނެއެވެ. އެހެންކަމުން މަސްވެރިކަން ރަނގަޅު ދުވަސް ވަރަށް މަސްކިރޭނެ ރަނގަޅު އިންތިޒާމެއް ހަމަޖައްސާ، ބާނާ މަސްކޮޅު ފަސޭހައިން ކިރާލެވޭނެ އިންތިޒާމް ހަމަޖައްސައި ދިނުމަށް މަސްވެރިން ދަނީ ބުނަމުންނެވެ.
