ޤަވާޢިދާ ޚިލާފަށް، ބެލެހެއްޓުމެއް ނެތި އިންޑިއާ ކަނޑުން ބޯވަދިހަ މަސް ބާނަމުންދާތީ ކަނޑުމަހުގެ ސްޓޮކަށް އޭގެ އަސަރު ކުރާނެ ކަމަށް ވޯލްޑް ވައިލްޑް ފަންޑު ފޮރ ނޭޗަރ އިން ނެރުނު ރިޕޯޓެއްގައި ބުނެފިއެވެ.
ވޯލްޑް ވައިލްޑް ފަންޑު ފޮރ ނޭޗަރ އިން ނެރުނު ރިޕޯޓެއްގައި ބުނެފައިވަނީ ބޯވަދިހަމަހަކީ ކަނޑުމަހުގެ މުޙިއްމު ކާނާގެ ބާވަތަކަށްވާއިރު، ބޯވަދިލަމަސް އިންޑިއާ ކަނޑުގެ ބޮޑު ސަރަޙައްދެއްގައި އެއްވެސް ވަރަކަށް ބެލުމެއްނެތި ބާނަމުންދާ ކަމަށެވެ. އަދި މިކަމުގެ އަސަރު ކަނޑުމަހުގެ އިތުރަށް ކަނޑުގެ އެހެން ދިރުންތަކަށްވެސް ކުރާނެ ކަން އެ ރިޕޯޓުގައި ފާހަގަކޮށްފައިވެއެވެ.
އެގޮތުން އިންޑިއާ ކަނޑުގެ ދެކުނުން 700،000 ކިލޯ މީޓަރުގައި ބޯވަދިލަމަހުގެ މަސްވެރިކަން ފާއިތުވީ 5 އަހަރު ދުވަހުގެތެރޭ 830 އިންސައްތަ އިތުރުވެފައިވާ ކަމަށެވެ. އަދި މިއަށްވުރެ މިއަދަދު އިތުރުވުމަކީ އެކަށީގެންވާ ކަމެއްކަމަށް މި ރިޕޯޓުގައިވެއެވެ. އަދި އިންޑިއާއިން ފެށިގެން އޮސްޓްރޭލިއާ އާއި ހަމައަށް އޮންނަ ކަނޑުގެ ސަރަޙައްދުގައިވެސް ބެލެހެއްޓުމެއްނެތި ބޯވަދިލަމަހުގެ މަސްވެރިކަން ކުރަމުންދާ ކަމަށް މި ރިޕޯޓުގައި ބުނެފައިވެއެވެ.
ވޯލްޑް ވައިލްޑް ފަންޑު ފޮރ ނޭޗަރއިން ހާމަކުރާގޮތުގައި އިންޑިއާ ކަނޑާއި ގުޅޭ ބައިނަލްއަޤްވާމީ އެއްބަސްވުންތައް ޤާއިމްކުރާ އިންޑިއަން އޯޝަން ޓޫނާ ކޮމިޝަންފަދަ ޖައްމިޔާތަކުން ކަނޑުމަހުގެ ކާނާގެ ގޮތުގައި ބޭނުންކުރާ ހުރިހާ ބާވަތެއް ރައްކާތެރިކުރުމަށް މަސައްކަތް ނުކުރާ ކަމަށާއި، އެހެންނަމަވެސް ކަނޑުމަހުގެ ސްޓޮކް ދެމެހެއްޓުމަށް މިއީ މުއްޙިމު ކަމެއް ކަމަށެވެ.
އިންޑިއާ ކަނޑުގެ މަސްވެރިކަމަށް ދުނިޔޭގެ ސަމާލުކަން މިފަހުން ލިބިފައިމިވަނީ މަހުގެ ސްޓޮކް އިތުރުކުރުމަށް ހަރުދަނާ ފިޔަވަޅުތަކެއް ނާޅައިފި ނަމަ، ޓެކްސްކޯ ކުންފުނިން އިންޑިއާ ކަނޑުން ބާނާ މަސް ނުގަންނާނެ ކަމަށް ބުނުމުންނެވެ. އިނގިރޭސިވިލާތުގެ މައްޝޫރު ޓެސްކޯ ކުންފުނީގެ އިތުރަށް އެޤައުމުގެ އެހެން ކުންފުނިތަކުންވެސް ދަނީ މިގޮތަށް އަމަލުކުރާނެ ކަމުގެ އިންޒާރު ދެމުންނެވެ.
އިންޑިއާ ކަނޑުގެ ރީނދޫ އުރަހަ ކަންނެލި އަކީ ދުނިޔޭގައި ބެލުހެއްޓުމެއް ނެތި އެންމެ ގިނަ އަދަދަކަށް ބާނަމުންދާ މަހެވެ. މިއާ އެކު 2026ވަނަ އަހަރު އަންނަން ވާއިރު ރީނދޫ އުރަހަ ކަންނެލި ވަރަށް ބޮޑަށް މަދުވުމުގެ ބިރު އެބަ އޮތްކަމަށް ސައިންސްވެރިން ދަނީ ބުނަމުންނެވެ.
