އިންސާނުންގެ އަމަލުތައް ހުންނަ ގޮތުން ކަނޑުގެ ދިރުމަށް ކުރަމުންދާ ނޭދެވޭ އަސަރުތަކުގެ ވާހަކައަކީ އާ ވާހަކަތަކެއް ނޫނެވެ. މިކަމާއި ގުޅޭ ފޮޓޯތައްވެސް ސޯޝަލް މީޑިއާގައި އަބަދުވެސް ދައުރުވެއެވެ.
އެގޮތުން މި ބަލާލަނީ މިއަހަރުގެ މިފަދަ އެންމެ މާނަ ފުން ފޮޓޯތަކަށެވެ. މި ފޮޓޯތަކުން ތިމާވެއްޓަށް ބަލާނުލާ އިންސާނުން ކުރަމުންދާ ކަންތައްތަކާއި އެކު ކަނޑުގައި ދިރިއުޅޭ މަސްމަހާ މެއްސަށް ކުރަމުންދާ ނޭދެވޭ އަސަރުތައް ވަރަށް ފުރިހަމައަށް ދައްކާދެއެވެ.
- ޑައިވްކުރުމަކީ ގިނަ ބަޔަކު ޝައުގުވެރިކަން ހުންނަ ކަމެކެވެ. މިކަމުގައިވެސް ވިސްނާލަން ޖެހޭ ކަންތައްތަކެއް ހުރެއެވެ. މި ފޮޓޯއިން މި ފެންނަނީ ޑައިވަރެއްގެ ރެގިއުލޭޓަރ ހޯލްޑަރެއް މިޔަރެއްގެ ގައިގައި އެޅިފައި އޮތްތަނެވެ. މި ފޮޓޯއިންވެސް އެ މިޔަރަށް ވެފައިވާ ގެއްލުން ފެނެއެވެ.
- ދެން މި ބަލާލާ ފޮޓޯއަކީ ރާއްޖޭގެ ފޮޓޯއެކެވެ. ރާއްޖެއަށް އެއް ފަހަރު ބޭނުންކޮށްފައި އުކާލާ ޕްލާސްޓިކް އާ އެކު ތިމާވެއްޓަށްވަމުންދާ ގެއްލުންތަކާއި އެކަމުން ކަނޑުގެ ދިރުންތަކަށް އޮތް ބިރުވެރިކަން މި ފޮޓޯއިން އިޙްސާސްވެގެންދެއެވެ. ބަރަވެލީގެ ބާވަތެއްކަމަށްވާ، ހަމިޓު ކެރެބެއް، އޭތި ވަދެ އޮންނަ ބޮއްޔަކަށް ބޭނުން ކުރަމުން އެދަނީ ކުންޏަށް އުކާފަހުރި އެއްޗެކެވެ. މުޅި ބަރަވެލި ވަށައިގެންވެސް އޮތީ ހުސް އުކާލާފައި ހުރި ޕްލާސްޓިކް ފުޅިއެވެ.
- ޤަވާއިދާ ހިލާފަތް ދާ ޖަލައިގެން ކުރާ މަސްވެރިކަމުން މަހުގެ ސްޓޮކަށް ވަރުންދާ ގެއްލުންތަކުގެ ވާހަކައަކީވެސް އާ ވާހަކައެއް ނޫނެވެ. ދާ ޖަހައިގެން ކުރާ މަސްވެރިކަމުގައި ބާނާ ބޭނުންވާ މަސްތައް ނޫން އެހެން މަސްތައްވެސް އެ ދަލުގައި ޖެހެއެވެ. މި ފޮޓޯއިން މި ފެންނަނީ އެފަދަ މަންޒަލެކެވެ. ލައިބީރިއާގެ ކަނޑުގެ ސަރަޙައްދުގައި ޤަވާއިދާ ހިލާފަށް މަސްވެރިކަން ކުރަމުން ދިޔަ ބޯޓަކުން ފެނުނު މަންޒަރެކެވެ. މަސް ބާނަން ބޭނުންކުރާ ދަލުގައި މިރަޔެއް ތާށިވެފައި އޮތް މަންޒަރެވެ.
- ޓޫނާ ނުވަތަ ކަނޑުމަސް ހިފުމަށް ދާ ޖައިގެން މަސްވެރިކަން ކުރާ ޤައުމުތައް ގިނައެވެ. މި ފޮޓޯއިން ފެންނަނީ ދާ ޖަހައިގެން މަސް ހިފާ ތަނެވެ.
- މި ފޮޓޯއިން މިފެންނަނީ މިޔަރެއްގެ އަނގައިގައި ދެ ބުޅި އަޅައިގަނެއްފައި އިންތަނެވެ. މިޔަރަށް އެބުޅި އަމިއްލަ އަށް ނުނެއްޓޭނެއެވެ. އޭގެ މުޅި ހަޔާތް ވޭތުކުރާނީ މި ވޭނުގައެވެ.
