ރާއްޖޭގައި ކޮލިޓީ ތަކެތި ވިއްކުމަށް މަޝްހޫރު "ބްރޭންޑްލޫމް" އިން ޒުވާން މަސްވެރިންނަށް ހިއްވަރު ދިނުމުގެ ގޮތުން އަގުހުރި ހަދިޔާތަކެއް ބަހައިފިއެވެ.
މިހަދިޔާތައް ބަހާފައިވަނީ މަސްވެރިކަން ޕްރަމޯޓްކޮށް ކުރިއަރުވަން މަސައްކަތް ކުރާ އަދި އާންމުންގެ މެދުގައި މަޤްބޫލު "ޒުވާން މަސްވެރިޔާ" ހަސަން ސާޖިން މެދުވެރިކޮށެވެ.
މަސްވެރިން އެމްވީއަށް މައުލޫމާތު ދެއްވަމުން ބްރޭންޑްލޫމްގެ ވެރިޔާ މުޙައްމަދު ނިޔާޒް ވިދާޅުވީ، ކުރިއާ އަޅާބަލާއިރު މަސްވެރިން މިހާރު ވަރަށް ބޮޑަށް ތަރައްޤީވެފައިވާކަމަށާއި، މިގޮތުން މަސްވެރިން މިހާރު ބޭނުން ކުރަނީ ޒަމާނީ އުފެއްދުންތައް ކަމަށެވެ. އަދި މިފަދަ ޒަމާނީ ކޮލިޓީ ޕްރޮޑަކްޓްތަކެއް ޒުވާން މަސްވެރިންނައް ހަދިޔާ ކުރީ އެ މަސްވެރިންނަށް ހިއްވަރުދީ އަދި ކޮލިޓީ ޕްރޮޑަކްޓްތަކެއް އެ މަސްވެރިންނަށް ފޯރުކޮށްދިނުމުގެ ގޮތުން ކަމަށް ނިޔާޒް ވިދާޅުވިއެވެ. ނިޔާޒް ވިދާޅުވީ 20 ހާސް ރުފިޔާގެ ސާމާނު ޒުވާން މަސްވެރިޔާ މެދުވެރިކޮށް މަސްވެރިންނަށް ހަދިޔާކޮށްފައިވާ ކަމަށެވެ.
"މިޒަމާނުގެ ކުދިން މަސްވެރިކަމަށް ދާއިރު އިހުޒަމާނާ ހިލާފަށް ވަރަށް ރީތިކޮށް މި ދަނީ ދެއްތޯ. ދެތިން ދުވަހުގެ ދަތުރަކަށް ތައްޔާރުވެގެން ބެކްޕެކް އަޅުވައިގެން މި ދަނީ. އަޅުގަނޑު ވަރަށް ޝައުޤުވެރިވާ ކަމެއް ޒުވާން މަސްވެރިންގެ ތެރޭގައި މިތަކެތި ފެތުރުން. ޒުވާން މަސްވެރިން ތަރައްޤީވެ ކުރިއަރައިގެން ދިއުން އަޅުގަނޑުގެ ބޭނުމަކީ. އެގޮތުގެ މަތިން އަޅުގަނޑު ހިތަށް އެރީ މި ކަހަލަ ޕްރޮޑަކްޓް ކޮޅެއް ފޯރުކޮށްދޭން. މި ނުފެންނަންޏާ ނޭންގޭނެ ދެއްތޯ މީގަ ހުރި ފެންވަރެއް." ބްރޭންޑްލޫމް ފިހާރައިގެ ވެރިޔާ މުޙައްމަދު ނިޔާޒް ވިދާޅުވިއެވެ.
ބްރޭންޑްލޫމް އިން މަސްވެރިންނަށް ހަދިޔާ ކުރި ތަކެތީގެތެރޭގައި މަސްކަނޑާ ވަޅިއާއި، ދަބަހާއި އަދި މިނޫންވެސް ކަނޑުމަތީގައި ބޭނުންކުރާ ކޮލިޓީ ސާމާނު ހިމެނެއެވެ.
"މީގަ މި ހުންނަނީ މަސްވެރިން ކަނޑުމަތީގަ އުޅޭއިރު އަދި ދަތުރު ފަތުރުކޮށް އުޅޭއިރު ގެންގުޅެން ހުންނާނެ ޕޮކެޓް ޓޫލް ކިޔާ އެއްޗެއް. މީގަ އިންނަ ވަޅި އިންނާނީ މަސްބާނާ އުޅޭއިރު ބުޅި ކަންވާރު ނައްޓާލެވޭ ކަހަލަ ގޮތަކަށް. ދެން މަސް ކަންޑަން ބޭނުންކުރާ ޕްރޮފެޝަނަލް ވަޅި ހުންނާނެ. ދެން ދަތުރު ފަތުރު ކުރަން ބޭނުންކުރަން ބޭނުންވާ ފޮއްޓާއި ލަގެޖާއި އުނަގަނޑުގަ އައްސާ ކަހަލަ އެކި ސައިޒްތަކުގެ ބޭގާއި ވޮލެޓާއި އައިނާއި އެކަހަލަ ހުރިހާ އެއްޗެއް." ނިޔާޒް ވިދާޅުވިއެވެ.
ނިޔާޒް ވިދާޅުވީ، މިއީ ފެށުމެއް ކަމަށާއި، ކުރިއަށް އޮތް ތަނުގައި މިފަދަ ތަކެތި މަސްވެރިންނަށް ވީހާވެސް ގިނައިން ހަދިޔާ ކުރެއްވުމަށް ވިސްނުން ގެންގުޅުއްވާ ކަމަށެވެ.
"ކުރިއަށް އޮތް ތާންގައި އަދި އިތުރު އެއްޗެހި މަސްވެރިންނަށް ހަދިޔާ ކުރާނަން. އަޅުގަނޑު އަޑުއަހާލަން ބޭނުންވޭ މަސްވެރިންގެ ދުލުން މި ވަޅީގެ ފަސޭހަ ކަމާ މީގެ ކޮލިޓީގެ ވާހަކަ." ނިޔާޒް ވިދާޅުވިއެވެ.
ބްރޭންޑް ލޫމް އިން ވިއްކާ ޕްރޮޑަކްޓްތަކަކީ ސްވިޒްލޭންޑްގެ މަޝްހޫރު ޕްރޮޑަކްޓް ތަކެކެވެ. މި ޕްރޮޑަކްޓް ތައް ރާއްޖެއަށް އެތެރެކޮށް މާކެޓް ކުރަނީ ބްރޭންޑްލޫމް އިންނެވެ. ބްރޭންޑްލޫމްގެ ފިހާރަ ހުންނަނީ ހުޅުމާލޭގައެވެ. އޯޑަރު ކޮށްލުމުން ރާއްޖޭގެ ކޮންމެ ހިސާބަކަށްވެސް މުދާ ޑެލިވަރީކޮށްދޭނެކަމަށް އެ ފިހާރައިން ބުނެއެވެ. އުރީދޫ މޫލީ އަދި ސަޕްލައި އެމްވީ މެދުވެރިކޮށްވެސް އެފިހާރައިގެ މުދާ ލިބޭނެކަމަށް ބްރޭންޑްލޫމް އިން ބުނެއެވެ.
