މާ ބޮއްމަސް

މިއީ ބޮއްމަހުގެ އާއިލާގެ މަސްމަހުގެ ތެރެއިން ވަރަށް ބިޔަވާ ބާވަތެކެވެ.

މިމަސް އެންމެ ބޮޑުވަނީ 38 ސެންޓިމީޓަރަށެވެ. މިއީ އެތެރެވެރީގެ ކަނޑުތަކުގައްޔާއި ފަރުތަކުގެ ބޭރުގައި 100 މީޓަރަށްވުރެ ތިލަ ހިސާބުތަކުގެ އަޑީގައިއުޅޭ ބަރުހެލި މަހެކެވެ. މިބާވަތުގެ މަހަށް ރާއްޖޭގައި ވަކިޚާއްސަނަމެއް ކިޔާ ނޫޅޭތީ މަހުގެ ސިފައަށާއި އިނގިރޭސިނަމަށް ވިސްނާ "މާ ބޮއްމަސް" ކިޔާ ނަންދީފައިވަނީ އެވެ.

މިއީ ދިވެހިން ކައިއުޅޭ މަހެއްނޫނެވެ. މިއީ އެސޮރު އުޅެމުންދާ މާހައުލާއި އެއްކުލައަކަށް ގައިގެ ކުލަ ބަދަލުކުރާ ޙަރަކާތްމަދު މަހެއްކަމުން އަޑިއަށް ފީނާއުޅޭ މީހުންނަށްވެސް މިބާވަތުގެ މަސް ދެނަގަތުން ވަނީ އުނދަގޫ ކަމަކަށެވެ. މަހުގެ ބުރަކަށިމަތީ ފުރަތަމަ ކަށި ބޮލުގެ މަތީގައި ވަދެއްގެ ގޮތަށް އުފެދިފައި ހުރެއެވެ. އަދި މި 'ވަދު' ކޫއްތުމުގެ ސަބަބުން އޭގެ ގާތަށް ޖަމާވާ ކުދި ކުދި މަސްމަހާމެހި އެސޮރުގެ ބޮޑު އަނގައިން ޝިކާރަކޮށް އެކުގައި ކާލައެވެ.

މަހުގެ ބުރަކަށިމަތީ ކޮތަރިބައިގެ ހަރުކަށިތައް (3 ހަރުކަށި) ހުންނަނީ އެއްކަށި އަނެއްކަށްޓާ ވަކިވަކިން ދުރުދުރުގައެވެ. އަދި މިކަށިތަކަށް ހުންނަނީ ހަންއަރާ ފޮރުވިފައެވެ.

މަހުގެ ލޯ ކުޑަވާނެއެވެ. އަދި ލޯ ހުންނަނީ ބޮލުގެ މަތީބައިގައެވެ. އަނގަ ހުންނަނީ މަށްޗަށް އުފުލިފައެވެ. އެއީ އެސޮރުގެ ކާނާ ޝިކާރަކުރުމަށް އަބަދުމެ ހަރަކާތްތެރިވާން ޖެހިފައިވަނީ މައްޗަށް ބަލައިގެން ކަމަށްވާތީއެވެ.