ހިމާޔަތްކުރާ ދިރޭތަކެއްޗާބެހޭ ގަވައިދު ގެޒެޓުކޮށްފި، ފިޔަވަޅުގެ ގޮތުގައި އެއްލައްކަ ރުފިޔާއާ ހަމައަށް ޖޫރިމަނާ ކުރެވޭ!

ޤުދުރަތީ ގޮތުގައި ނުވަތަ ޠަބީޢީ ގޮތުގައި ޙިމާޔަތްކޮށް ރައްކައުތެރިކުރާ ދިރޭ ތަކެއްޗާބެހޭ ގަވާއިދު ގެޒެޓްކޮށްފިއެވެ.

މިނިސްޓްރީއޮފް އެންވަޔަރަމަންޓުން އިއްޔެ ގެޒެޓްކުރި މި ގަވާއިދު ހަދާފައިވަނީ ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާއި ބެހޭ ޤާނޫނު (93/4) ގެ ދަށުންނެވެ. މި ގަވައިދަށް އަމަލުކުރަން ފެށުމާއި ގުޅިގެން ދިވެހިރާއްޖޭގައި ޙިމާޔަތްކޮށްފައިވާ ދިރޭތަކެއްޗާމެދު ޢަމަލުކުރެވިގެންދާނީ މި ގަވައިދުގައިވާ ގޮތުގެ މަތިންނެވެ.

މަސްވެރިކަމުގެ ދާއިރާއިން ދިވެހިރާއްޖޭގެ ކަނޑުގެ މާހައުލުގައި އުޅޭ ހުރިހާބާވަތެއްގެ ދޫނިތައް ހިފުމާއި، އަނިޔާކުރުމާއި އަދި އެތަކެތީގެ މާހައުލަށް ގެއްލުން ދިނުމަކީ މަނާކަމެކެވެ. މި ގަވާއިދުގައި ބަޔާންކުރާ ހިމާޔަތްކޮށްފައިވާ ދިރޭ ތަކެތި ހިފާ، ގޯނާކޮށް ނުވަތަ އެތަކެތީގެ މާހައުލަށް ގެއްލުންދީ ނުވަތަ މިގަވައިދުގައި ބަޔާންކުރާ އުސޫލުތަކާއި ޚިލާފްވާ ފަރާތްތައް -/30000 ރުފިޔާއާ -/100000 ރުފިޔާއާ ދެމެދުގެ އަދަަކުން ޖޫރިމަނާކުރާނެއެވެ.

މި ގަވައިދުގައި ހިމާޔަތްކޮށްފައިވާ ދޫނިތަކުގެ ތެރޭގައި އާންމުކޮށް މަސްވރިންނަށް ފެންނަ އައިންމަތީ ދޫނީގެ ހުރިހާ ބާވަތެއް ހިމެނެއެވެ. އެހެންކަމުން ޚާއްސަކޮށް މި ދޫނިތައް ހިމާޔަތްކުރުމާއި އަދި މިދޫނިތަކުގެ ވެށި ހިމާޔަތްކުރުމުގައި މަސްވެރިންގެ ދައުރު ވަރަށް ބޮޑެވެ. އައިންމަތީ ދޫންޏަކީ ދިވެހި މަސްވެެރިކަމުގައި ވަރަށް އެހީތެރިވެދޭ އެއްޗެކެވެ. މަސްވެރިން ކަނޑަށް ނުކުމެ، މަސް އައިން ހޯދުމުގައި އެންމެ ބޮޑަށް އެހީތެރިވާ އެއްޗަކީ އައިންމަތީ ދޫންޏެވެ. އެހެންކަމުން، އައިންމަތީ ދޫނިތައް ނުހިފުމާއި، އެތަކެތީގެ މާހައުލަށް ގެއްލުމެއް ލިބިދާނެފަދަ އެންމެހާ ކަންކަމުން ދުރުހެލިވެ، ދޫނިތައް ހިމާޔަތްކުރުމަށް އެންމެ އިސްދައުރެއް އަދާ ކުރެވޭނީ މަސްވެރިންނަށެވެ.

މި ގަވައިދުގައި ހިމެނޭ ބައިތަކުގެ ތެރޭގައި، ހިމާޔަތްކުރާ ތަކެއްޗަށް މެނޭޖްމަންޓް ޕްލޭނު ހެދުމާއި، ހިމާޔަތް ކުރާ ދިރޭތަކެތި ބަލަހައްޓާ ތަންތަން ރަޖިސްޓްރީ ކުރުމާއި އަދި ނެތިދިއުމުގެ ބިރު ހީވެފައިވާ ދިރޭތަކެތީގެ ލިސްޓެއް އެކުލަވާލުން ހިމެނެއެވެ.