ރާއްޖޭގައި މައިގަނޑު ގޮތެއްގައި ކުރަމުން އަންނަނީ ދެ ބާވަތެއްގެ މަސްވެރިކަމެކެވެ. އެއީ ދޮށީގެ މަސްވެރިކަމާއި، ކަންނެލީގެ މަސްވެރިކަމެވެ.
ކަންނެލީގެ މަސްވެރިކަމަކީވެސް ގިނަ އަދަދެއްގެ ދިވެހިން ކުރަމުން އަންނަ މަސްވެރިކަމެކެވެ. ރާއްޖެއަށް މި މަސްވެރިކަމުން ވެސް ރަނގަޅު ނަފާއެއް ލިބެއެވެ.
މިހާރު ކަންނެލީގެ މަސްވެރިކަން ކުރާ ގިނަ އަދަދެއްގެ އޮޑި ދޯނިފަހަރު ރާއްޖޭގައި އޮވެއެވެ. ހދ. މަކުނުދޫ، ވިދުވަރު ދޯނީގެ ކެޔޮޅު އަޙްމަދު ޢަލީ މިހާރު ބޮޑު ކަންނަލީގެ މަސްވެރިކަން ކުރާތާ 10 އަހަރުވަނީ ވެފައެވެ.
ކަންނެލީގެ މަސްވެރިކަން ކުރަން ފެށުމުގެ ކުރިން އޭނާ މަސައްކަތްކުރީ ދޮށީގެ މަސްވެރިކަމުގައެވެ. އަދި އޭގެކުރިން ދުވަސްކޮޅަކު ރިސޯޓެއްގައިވެސް މަސައްކަތްކުރިއެވެ. ރިސޯޓް ވަޒީފާއާއި އަޅާ ބަލާއިރު މަސްވެރިކަމުގެ ދާއިރާއަކީ މާ މިނިވަންކަން ބޮޑު ދާއިރާއެއް ކަމަށް އަޙްމަދު ބުންޏެވެ.
"މަސައްކަތުގެ ގޮތުން ބަލާއިރު މިދެ ދާއިރާ ހާސްބައި ތަފާތު، މަސައްކަތްކުރަން ބަލާއިރު، އަމިއްލަ މިނިވަންކަން ބޮޑު މަސްވެރިކަމުގެ ދާއިރާގައި،" އަޙްމަދު ބުންޏެވެ.
އަޙްމަދު ބުނީ ކަންނެލީގެ މަސްވެރިކަންކޮށްގެން މީގެ ކުރިން ރަނގަޅު އާމްދަނީއެއް ލިބުނު ނަމަވެސް މިހާރު ކަންނެލީގެ އަގު ވަރަށްބޮޑަށް ދަށަށް ގޮސްފައިވާ ކަމަށެވެ.
އަގުތައް މިގޮތަށް ދަށަށް ދާން ފަށާފައިވަނީ މީގެ ތިން އަހަރު ކުރިން ކަމަށް އަޙްމަދު ބުންޏެވެ. އެގޮތުން ލޭނު މަސްވެރިކަން ކުރުމަށް ސަރުކާރުން ކުންފުނިތަކަށް ދީފައިވާ ހުއްދަތައް ބާތިލްކުރި ހިސާބުން އަގުތަކަށް އޭގެ އަސަރު ކުރި ކަމަށެވެ.
"ކަންނެލި މަސްވެރިކަން ކުރާ ބައެއް ފަރާތްތަކަށް އޭރު ހީވެފައި އޮތީ ލޭނެ މަސްވެރިކަން ކުރާ ބޯޓުތަށް ރާއްޖެއަށް ފޮނުވާލެވިއްޖެއާ ދިވެހި ކަންނެލި މަސްވެރިކަން ކުރާ ފަރާތްތަކުގެ މަހުގެ އަގު އުފުލޭނެ ކަމަށް، އެކަމަކު ކަން ވެގެން ދިޔައީ އެހެންނެއް ނޫން،" އަޙްމަދު ބުންޏެވެ.
އަޙްމަދަކީ ބޮޑު ކަންނެލި މަސްވެރިންގެ ޔޫނިއަން އުފެއްދުމުގައިވެސް އިސްކޮށް ހަރަކާތްތެރިވި ފަރާތެކެވެ. އަޙްމަދު ބުނީ ބޮޑު ކަންނެލި މަސްވެރިންގެ ޔޫނިއަންއިން ސަރުކާރާއި ގުޅިގެންވެސް މަސައްކަތްތައް ކުރަމުންދާ ކަމަށެވެ. އެހެން ނަމަވެސް ސަރުކާރުގެ ވިސްނުން ހުރި ގޮތުން މަހަށް ރަނގަޅު އަގެއް ލިބޭނެ ކަމަށް ޤަބޫލް ނުކުރެވޭ ކަމަށް އަޙްމަދު ބުންޏެވެ.
"ސަރުކާރުން މިކަމަކަށް އެއްވެސް ވަރެއްގެ އެއްބާރުލުމެއް ނުލިބޭ، އެކަމަކުވެސް ޖަމިއްޔާއިން ދަނީ ހަމަ މަސައްކަތް ކުރަމުން މިކަމަށް ހައްލެއް ހޯދާ، ކަންނެލީގެ މަސްވެރިކަން ކުރާ ފަރާތްތަކަށް ރަނގަޅު އަގެއް ހޯދައިދިނުމަށް،" އަޙްމަދު ވިދާޅުވިއެވެ.
އަޙްމަދު ބުނީ ކޯވިޑާއި ގުޅިގެން އާމްދަނީއަށް ނުރަނގަޅު އަސަރުކުރި ފަރާތްތަކަށް ސަރުކާރުން އިންކަމް ސަޕޯޓް އަލެވަންސް ދެމުންދާއިރު، މަސްވެރިކަން ކުރާ ބައެއް ފަރާތްތަކަށް މި އެލަވެންސް ލިބޭއިރު، ކަންނެލީގެ މަސްވެރިކަން ކުރާ ފަރާތްތަކަށް މި އެލަވަންސް ނުދޭ ކަމަށެވެ. އަދި މިއީ އެންމެ އިންސާފްވެރިގޮތް ނޫން ކަމަށްވެސް އަޙްމަދު ބުންޏެވެ.
"ސަރުކާރާއި މިވާހަކަ ދެއްކީމަ ބުނީ، މަސް ގަންނަ ކުންފުނިތަކަށް ލޯން އުސޫލުން ފައިސާ ދީފައިވާ ކަމަށް، އެކަމަކު އޭގެން މަސްވެރިންނަށް ކުރި ފައިދާއެއް ނެތް،" އަޙްމަދު ބުންޏެވެ.
ބޮޑުކަންނެލީގެ މަސްވެރިންގެ ޔޫނިއަން އިފްތާހުކުރުމަށް މިދިޔަ މަސްވެރިންގެ ދުވަހު ބޭއްވި ޚަރަކާތަކީ ތަފާތު ގޮތަކަށް ބޭއްވި، އާއްމުންގެ ސަމާލުކަން އަތުލައިގަތް ހަރަކާތެކެވެ. މިއީ ރާއްޖޭގެ އެންމެ ގިނަ ދޯނިފަހަރުން އެއްތަނަކަށް އެއްވެ މިހާތަނަށް ބޭއްވި އެންމެ ބޮޑު އިވެންޓެވެ.
