26 ފެބްރުއަރީ 2021 ގެ ފަހުން ދ. ކުޑަހުވަދޫއަށް ދިޔަ ފަރާތްތައް ކަރަންޓީން ވާން އެޗްޕީއޭއިން އަންގާފައިވާތީ ތ. ހިރިލަންދޫ 3 ދޯނީގެ މަސްވެރިން ކަރަންޓީން ކޮށްފިއެވެ.
މަސްވެރިން އެމްވީއަށް މަޢުލޫމާތުދެއްވަމުން ހިރިލަންދޫ ކައުންސިލްގެ ރައީސް މުޙައްމަދު ޖަލާލު ވިދާޅުވީ، 3 ދޯނީގެ މަސްވެރިންގެ ތެރެއިން ގިނަ އަދަދެއްގެ މަސްވެރިން ކަރަންޓީނު ކުރީ 26 ފެބްރުއަރީ 2021ގެ ފަހުން ކުޑަހުވަދުއަށް ފޭބުމުގެ ސަބަބުން ކަމަށެވެ. މީގެ ތެރެއިން 2 ދޯނީގެ މީހުން ގޭގައި ކަރަންޓީންކޮށްފައިވާއިރު އަނެއް ދޯނީގެ މަސްވެރިން ކަރަންޓީން ވެފައިވަނީ ދޯނީގައެވެ. މި މީހުންގެ ސާމްޕަލްތައް މިހާރު ނަގާފައިވާކަމަށާއި ނަތީޖާ ނެގެޓިވް ކަމަށްވާ ނަމަ ކަރަންޓީނުން ދޫކޮށްލާނެކަމަށް ޖަލާލު ވިދާޅުވިއެވެ. ސަބަބަބީ މި ތިން ދޯނިވެސް ކުޑަހުވަދޫއަށް ގޮސްފައިވަނީ މީގެ 14 ދުވަސް ކުރިން ކަމަށް ވާތީ ކަމަށް ޖަލާލު ވިދާޅުވިއެވެ.
ދ. ކުޑަހުވަދޫއިން ކޯވިޑް-19ގެ ޕޮޒިޓިވް ކޭސްތަކެއް ފެނިފައިވާތީ، 26 ފެބްރުއަރީ 2021 ގެ ފަހުން ދ.ކުޑަހުވަދޫގައި އުޅެފައިވާ އަތޮޅުތެރޭގެ އެއްވެސް ރަށަކަށް ގޮސްފައިވާ ފަރާތެއްވާނަމަ، ވީ އެންމެ އަވަހަކަށް އެރަށެއްގެ ހޮސްޕިޓަލް/ހެލްތް ސެންޓަރަށް އެންގުމަށް އެޗްޕީއޭއިން ވަނީ ބުނެފައެވެ. އަދި މިތާރީޚްގެ ފަހުން ދ. ކުޑަހުވަދޫއަށް ގޮސްފައިވާ ފަރާތެއްވާނަމަ، ކުޑަހުވަދޫއިން އަނބުރާ ރަށަށް އައި ދުވަހުން ފެށިގެން 14 ދުވަސްވަންދެން ކަރަންޓީނުގައި ތިބުމަށްވެސް އެޗްޕީއޭއިން ވަނީ އަންގާފައެވެ.
ކުޑަހުވަދޫއިން މިހާތަނަށް 19 މީހުން ވަނީ ޕޮޒިޓިވް ވެފައެވެ.
