މޫސުން ވަރަށް ގޯސްވެ، ހާލަތު އިތުރަށް ގޯސްވާނެ ކަމަށް ލަފާކޮށް ރާއްޖޭގެ އެންމެ އުތުރުގެ ރަށްތަކަށް ރާއްޖޭގެ މޫސުމާއި ބެހޭ ގައުމީ އިދާރާ އިން އޮރެންޖް އިންޒާރު ނެރެފިއެވެ.
އޮރެންޖު އިންޒާރު ނެރެފައިވަނީ، ހއ. އަތޮޅުން ފެށިގެން ޅ އަތޮޅުގެ ރަށްތަކަށެވެ. މޫސުމާ ބެހޭ ޤައުމީ އިދާރާއިން ބުނީ މި ސަރަހައްދުތަކުގެ ރަށްތަކަށް ބޯކޮށް ވާރޭވެހި ފެންބޮޑުވާނެ ކަމަށާއި، ގަޑިއަކު 34 މޭލާއި، 40 މޭލާ ދެމެދުގެ ބާރުމިނުގައި ވައިޖެހޭނެ ކަމަށެވެ. އަދި ވިލާގަނޑުގައި ގަޑިއަކު 60 މޭލަށް ވައިގަދާވެނެ ކަމަށްވެސް މެޓް އޮފީހުން ބުނެއެވެ. އަދި ކަނޑުތައް ގަދަވެ، ބައެއް ރަށްތަކަށް ރާޅު އަރާފާނެ ކަމަށް ވެސް އެ އިދާރާއިން ބުނެއެވެ.
މިދުވަސްވަރަކީ މުޅި ރާއްޖެއަށް ވިއްސާރަ ދުވަސްވަރެކެވެ. ވިއްސާރައިގެ ސަބަބުން ބައެއް ރަށްރަށުގެ ފެންބޮޑުވެ ބޮޑެެތި ގެއްލުންތައް ދަނީ ވަމުންނެވެ. ޚާއްޞަކޮށް ރާއްޖޭގެ އުތުރުގެ އަތޮޅުތަކަށް އުދަ އެރުމާއި ވިއްސާރައިގެ ސަބަބުން ބޮޑެތި ގެއްލުން ވަމުންދާ ކަން ފާހަގަކޮށްލެވެއެވެ.
