މަސްވެރި އާއިލާތައް އަތްމަތި ހުސްވެ ދަރަނި ވެރިވެއްޖެކަމަށް ބޮޑުކަންނެލި މަސްވެރިންގެ ޔޫނިއަނުން ބުނެފިއެވެ.
ބޮޑުކަންނެލީގެ މަސްވެރިންގެ ޔޫނިއަނުން ބުނެފައިވަނީ ކުރިޔަށް މިދާ 2021 ވަނަ އަހަރަކީ ކަންނެލި މަސްވެރިކަން މިހާތަނަށް އެންމެ ދަށް އަހަރުކަމަށާއި މި ޝިނާއަތް ނެތި ހިގައިދާނެ ކަމުގެ ބިރު ބޮޑުވެއްޖެ ކަމަށެވެ. މިއާއެކު މަސްވެރިންގެ ޝަކުވާ އަޑުއަހާނެ ފަރާތެއް ނެތީތޯ ކަންނެލި ޔޫނިއަނުން ވަނީ ސުވާލު އުފައްދާފައެވެ.
މުޅި ދުނިޔެއަށް ކުރިމަތިވެފައިވާ ކޮވިޑްގެ ނުރައްކާތެރި ބަވާގައި ޤައުމުގެ ބޯޑަރު ބަންދުކޮށް ޤައުމުގެ އިޤްތިޞާދު ހުއްޓުނު އިރު ހަމައެކަނި ވިންދު ޖަހަޖަހައި އޮތީ މަސްވެރިކަން ކަމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ. އައި މިއީ މަސްވެރިކަން ނަގާ ކޮޅަށްޖަހަންވީ ވަގުތު ކަމަށް އެމަނިކުފާނު ވަނީ ވިދާޅުވެފައެވެ. އަދި ހަމައެކަނި އެއް ސިނާއަތަށް (ފަތުރުވެރިކަމަށް) އިންވެސްޓުކުރުމުގެ ހިތި ނަތީޖާ ފެނިއްޖެކަމަށާއި އެހެންކަމުން މިއީ ފަތުރުވެރިކަމާ އެއްވަރަށް މަސްވެރިކަންވެސް ކުރިއަރުވަން ޖެހޭކަމަށް ރައީސް ވަނީ ވިދާޅުވެފައެވެ. ރައީސުލްޖުމްހޫރިއްޔާގެ މި ވާހަކަފުޅުތަކުން މަސްވެރިންނާއި މަސްވެރި އާއިލާތަކަށް އުންމީދު ގެނެސްދިނެވެ. ނަމަވެސް މި ވާހަކަފުޅުތައް ވިދާޅުވިތާ 5 މަސް ފާއިތުވެގެން ދިޔައިރު މަސްވެރިކަމުގެ ދާއިރާ ކުރިއަރުވަން ކުރެވުނު ހަމަ އެއްކަމެއްވެސް ނެތެވެ. ކުރެވުނުހާވެސް ކަމަކީ މަސްވެރިކަމާ ބެހޭ ވަޒީރު ބަދަލުކޮށް އާ ވަޒީރަކު ލުމެވެ. ނަމަވެސް އާވަޒީރު ވަޒީރު ކަމާ ހަވާލުވިތާ މަސް ދުވަސް ފާއިތުވިއިރުވެސް ވަޒީރުގެ އެއްވެސް ހިލަމެއް ނުވެއެވެ. މަސްވެރިންނޭ ކިޔާފައި ޓުވީޓުގަނޑެއްވެސް ނުކުރެވެއެވެ.
މިއަދުވެސް މަސްވެރިން އެދަނީ ހިއްވަރު ދައްކަމުންނެވެ. އަނބިދަރިންނާއި އާއިލާއާއި ދުރުގައި ދޯނިފަހަރުގައި ކަރަންޓީނުވެގެންވެސް މަހަށްދަމުންނެވެ.
