ށ.ފުނަދޫ ބޭރުން ކަނޑައިގެން ދިޔަ ކަނދުފަތި ހަރުކޮށްފިއެވެ.
މި ކަނދުފަތި ހަރުކޮށްފައިވަނީ ފުނަދޫގެ އިރުން 11.5 މޭލު ބޭރުގައެވެ. ފިޝަރީޒް މިނިސްޓްރީން މިހާރު ގެންދަނީ ކަނޑައިގެންގޮސްފައިވާ ކަނދުފަތިތައް އެޅުމުގެ މަސައްކަތް ކުރަމުންނެވެ. މިގޮތުން މީގެ ދެ ދުވަސް ކުރިން ކ. ދިއްފުށީ ބޭރުން ކަނޑައިގެންދިޔަ ކަނދުފަތި ވަނީ ހަރުކޮށްފައެވެ.
ފިޝަރީޒް މިނިސްޓްރީއިން މިހާރު އަމަލުކުރަމުންދާ އުސޫލަކީ އެއްވެސް ސަރަހައްދެއްގެ ކަނދުފައްޗެއް ކަނޑައިގެން ގޮސްފިނަމަ، އެކަމުގެ މައުލޫމާތު ކައުންސިލްތައް މެދުވެރިކޮށް ރަސްމީކޮށް އެންގުމުން ކަނދުފަތި ހަރުކުރުމަށް މަސައްކަތް ފެށުމެވެ. އެހެންކަމުން ކަނދުފަތި ކަނޑައިގެން ދިއުމުން އޭގެ މައުލޫމާތު ކައުންސިލްތަކާއި ހިއްސާކުރުމަށް ހުރިހާ މަސްވެރިން ސަމާލުވާން ޖެހެއެވެ. ކަނދުފައްޗެއް ކަނޑައިގެން ގޮސްފިނަމަ ލަސްނުކޮށް އެކަން ފިޝަރީޒް މިނިސްޓްރީއަން އެންގުމަށް އެ މިނިސްޓްރީން އިލްތިމާސްކުރެއެވެ.
މަސްވެރިންގެ ލާބައާ މަންފާއަށް ރާއްޖޭގެ އެކި ސަރަހައްދުތަކުގައި 56 އޮއިވާލި ކަނދުފަތި ވަނީ ހަރުކޮށްފައެވެ. ކަނދުފައްޗެއް އެޅުމަށް ދެލައްކައަށްވުރެ ރުފިޔާ ހަރަދުވާއިރު، ކަނދުފަތީގެ ވިއުގައަށް ގެއްލުމެއް ލިބޭނެ އެއްވެސް ކަމެއް ނުކުރުމަށް ފިޝަރީޒް މިނިސްޓްރީން އިލްތިމާސްކުރެއެވެ.
