ކަނޑުއޮތްގިރި ޑައިވް ސްޕޮޓުން މިިޔަރުގެ މަސްވެރިކަން ކޮށްފައިވާތީ އެކަން މިފްކޯއިން ކުށްވެރިކޮށްފި

ކަނޑުއޮތްގިރި ޑައިވް ސްޕޮޓުން ބަޔަކު މިިޔަރުގެ މަސްވެރިކަން ކޮށްފައިވާތީ އެމަލު މިފްކޯއިން ކުށްވެރިކޮށްފިއެވެ.

މިކަމާއި ގުޅިގެން މިފްކޯއިން ނެރުނު ބަޔާނެއްގައި ބުނެފައިވަނީ އެކުންފުނީގެ މަސް ޕްރޮސެސްކުރާ ރަށެއްކަމަށްވާ ކަނޑުއޮތްގިރި ކައިރީ އޮންނަ ޑައިވް ސޮޕްޓުން މިޔަރުގެ މަސްވެރިކަން ކޮށްފައިވާ ކަން ފާހަގަކުރެވިފައިވާ ކަމަށެވެ. އަދި މިއީ ކަނޑުއޮތްގިރީގެ މުވައްޒަފުންކޮށްފައިވާ ކަމެއްް ނޫން ކަމަށާއި، މިޔަރުގެ މަސްވެރިކަން ކުރުމަކީ ރާއްޖޭގައި މަނާ ކަމެއް ކަމުގައިވާއިރު، މިކަމާއި ގުޅޭގޮތުން އެކުންފުނީގެ މުވައްޒަފުން ހޭލުންތެރިކުރުވުމަށް ޤަވާއިދުން ސެޝަންތަށް ބާއްވާ ކަމަށެވެ.

މިފްކޯއަކީ ދެމެހެއްޓެނިވި މަސްވެރިކަމަށް ތާއީދު ކުރާ ކުންފުންޏެއް ކަމަށާއި، މިޔަރުގެ މަސްވެރިކަން ކުރުން މަނާކޮށްފައި އޮތް އޮތުމަށް އެއްބާރުލުންދޭ ކުންފުންޏެއް ކަމަށްވެސް މިފްކޯގެ ބަޔާނުގައި ބުނެފައިވެއެވެ.

މިޔަރުގެ މަސްވެރިކަން ކުރާތަން ފެނިއްޖެނަމަ އެކަން ވީހާވެސް އަވަހަށް ރިޕޯޓުކުރުމަށްވެސް މިފްކޯއިންވަނީ އާއްމުންގެ ފަރާތުން އެދިފައެވެ.