ސަރުކާރުން މަސްވެރިކަމަށް ގެންނަ ހެޔޮ ބަދަލުގެ ދަށުން މަސްވެރިންނަށް ވަރަށް ބޮޑު ފަސޭހަތަކެއް ލިބިގެންދާ ކަމަށް މިނިސްޓަރ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރ ޑރ.ހުސެއިން ރަޝީދު ހަސަން ވިދާޅުވެއްޖެއެވެ.
މިނިސްޓަރ ޑރ. ހުސެއިން މިހެން ވިދާޅުވީ، 5 ވަނަ ޖީލުގެ މަސްދޯނިފަހަރު ފަރުމާކުރުމުގެ އެއްބަސްވުމުގައި ސޮއިކުރުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.
ޑރ ހުސައިން ރަޝީދު ހަސަން ވިދާޅުވީ، މި ސަރުކާރުން މަސްވެރިކަމަށް ގެންނަ ހެޔޮ ބަދަލުގެ ދަށުން މަސްވެރިންނަށް ވަރަށް ބޮޑު ފަސޭހަތަކެއް ލިބިގެންދާނެކަމަށެވެ. އަދި އަލަށް ތަޢާރަފްކުރާ 5 ވަނަ ޖީލުގެ މަސްދޯނިތަކާއިއެކު މަސް ބޭނުމަށް މިހާރު ހިނގާ ހަރަދު ކުޑަވާނެކަމަށް މިނިސްޓަރު ވިދާޅުވިއެވެ.
"ރައީސް އިބްރާހިމް މުހައްމަދު ސާލިޙްގެ ސަރުކާރުން މިގެންނަ ހެޔޮ ބަދަލުތަކުގެ ސަބަބުން ނަތީޖާއަކަށްވާނީ މަސްބޭނުމަށްޓަކައި އަދި ކިރުމަށްޓަކައި މިޖަހަންޖެހޭ ރޭސް ޖަހަން ނުޖެހުން. އޭރުން މިހާރަށްވުރެ އަގުހެޔޮކޮށް އަޅުގަނޑުމެންނަށް މަސް ބޭނޭނެ. އަޅުގަނޑު އުންމީދުކުރަނީ 5 ވަނަ ޖީލުގެ މަސްދޯނި އަޅުގަނޑުމެންނަށް ތައާރަފްކުރެވުމުންވެސް މި ހެޔޮ ބަދަލު އަންނާނެ. އޭރުން ރޭސްނުޖަހައި އަޅުގަނޑުމެންނަށް މަސް ބާނައިގެން އައިސް މަސް ކިރޭނެ." މިނިސްޓަރ ޑރ. ހުސައިން ވިދާޅުވިއެވެ.
