ކުންފުނިތަކަށް ބޮޑު ކަންނެލި ގަނެވޭނެ އެންމެ ދަށް އަގު ކަނޑައަޅުމުގެ މަސައްކަތް ކުރަމުން ގެންދާތާ އަހަރަކަށްވުރެ ގިނަ ދުވަސް ވެއްޖެއެވެ. އަގު ކޮންޓްރޯލް ކުރުމަށް ފިޝަރީޒް މިނިސްޓްރީއާ ކަންނެލި ގަންނަ ކުންފުނިތަކާ އަދި ކަންނެލި މަސްވެރިންގެ ޖަމްއިއްޔާއާއެކު ގިނަ މަޝްވަރާތަކެއް ކުރެވުނެވެ. ކަންނެލީގެ މަސްވެރިކަން ކުރާ މަސްވެރިންގެ ފަރާތުން ބޮޑު ކަންނެލި މަސްވެރިންގެ ޔޫނިއަނުން އެފަރާތުން ބޭނުންވާ އަގުވެސް ހުށައެޅިއެވެ. އަދި ކުންފުނިތަކުން އެކުންފުނިތަކުން ބޭނުންވާ ކޮންޓްރޯލް އަގު ހުށައެޅިއެވެ. ކަންނެލީގެ އަގު ކޮންޓްރޯލް ކުރަން ނިންމާ ގެޒެޓްކުރަން ރައީސް އޮފީހަށްވެސް ފޮނުވިއެވެ. ނަމަވެސް މިއަދާ ހަމައަށްވެސް އަގު ކޮންޓްރޯލް ކުރެވިފައި ނުވެއެވެ.
އަގު ކޮންޓްރޯލް ނުކުރެވި އޮތީ އެެއްބަސްވުމަކަށް ނާދެވިގެންނެވެ.
ބޮޑުކަންނެލީގެ އަގު ކޮންޓްރޯލް ކުރަން ބޮޑު ކަންނެލީގެ މަސްވެރިންގެ ޔޫނިއަނުން ހުށައަޅާފައިނީ ކިލޯއެއް 80 ރުފިޔާއެވެ. މިއަގު ހުށައެޅިއިރު ކަންނެލީގެ އަގު ހުރީ ގާތްގަނޑަކަށް 60 ރުފިޔާއަށެވެ. ނަމަވެސް ފާއިތުވި 6 މަސްދުވަހުގެތެރޭގައި ކަންނެލީގެ އަގު ވަނީ ވަރަށް ބޮޑަށް އުފުލިފައެވެ. މި މުއްދަތުގެ ތެރޭގައި ކަންނެލީގެ އަގު 100 ރުފިޔާއަށްވުރެ ދަށަކަށް ނުވެއްޓެއެވެ. ބައެއް ފަހަރު 130 ރުފިޔާއަށްވެސް ކަންނެލި ކިލޯއެއް އަރައިގެން ދެއެވެ.
ކަންނެލީގެ އަގު މިގޮތުގައި ހުރިއިރު އަގު ކޮންޓްރޯލް ކުރާ ވާހަކަ މިހާރު ވަނީ މަޑުޖެހިފައެވެ. ސަބަބަކީ އަގު ކޮންޓްރޯލް ކޮއްފިނަމަ ވާދަވެހި މާހައުލެއްގައި ކަންނެލީގެ އަގު މިގޮތަށް އަރައިގެން ދިއުމުގެ ފުރުޞަތު ކުޑަވާނެތީއެވެ. ބޮޑު ކަންނެލި ގަންނަ ކުންފުނިތަކުން ބުނާ ގޮތުގައި ކަންނެލީގެ އަގު ކޮންޓްރޯލް ކޮއްފިނަމަ އެއަގަށްވުރެ ބޮޑު އަގެއްގައި ކަންނެލި ނުގަންނާނެއެވެ. އެހެން ކަމުން ކަންނެނި މަސްވެރިންނަށް އެންމެ ފައިދާ ބޮޑުވާނީ ކަންނެލީގެ އަގު މިގޮތަށް ދޫކޮއްލާފައި އޮތުން ކަމަށް މި ވިޔަފާރީގައި ހަރަކާތްރެވީ ފަރާތްތަކުން ބުނެއެވެ.
