މިދިޔަ މަހު ރާއްޖެއިން 70 މިލިއަން ރުފިޔާގެ ގަނޑުކުރި ކަންނެލި މަސް އެކްސްޕޯޓުކޮށްފައިވާ ކަމަށް ކަސްޓަމްސްއިން ބުނެފިއެވެ.
ކަސްޓަމްސްއިން އާންމުކޮށްފައިވާ މިދިޔަ މަހުގެ ތަފާސްހިސާބުތައް ދައްކާގޮތުން މިދިޔަ މަހު ރާއްޖެއިންވަނީ 328 މިލިއަން ރުފިޔާގެ މުދާ އެކްސްޕޯޓްކޮށްފައެވެ. ރާއްޖެއިން މައިގަނޑުގޮތެއްގައި އެކްސްޕޯޓުކުރަނީ މަހުގެ ބާވަތްތަކެވެ.
ސެޕްޓެމްބަރުމަހުގެ ރާއްޖެއިން އެންމެ ގިނަ އަދަދަކަށް އެކްސްޕޯޓުކޮށްފައިވަނީ ގަނޑު ކުރި ރީނދޫ އުރަޙަ ކަންނެންޏެވެ. އެގޮތުން މިދިޔަމަހު 70 މިލިއަން ރުފިޔާގެ ގަނޑުކުރި ރީނދޫ އުރަޙަ ކަންނެލި ރާއްޖެއިން އެކްސްޕޯޓުކޮށްފައިވާއިރު، މި އަދަދަކީ މިދިޔަ އޮގަސްޓުމަހު ރާއްޖެއިން އެކްސްޕޯޓުކުރި ގަނޑުު ކުރި ރީނދޫ އުރަޙަ ކަންނެލީގެ އަދަދާއި އަޅާ ބަލާއިރު 45 އިންސައްތަ އިތުރު އަދެކެވެ. މިދިޔަ އޮގަސްޓުމަހު ރާއްޖެއިން އެކްސްޕޯޓުކޮށްފައިވަނީ 48 މިލިއަން ރުފިޔާގެ ގަނޑުކުރި ރީނދޫ އުރަޙަ ކަންނެންޏެވެ.
ތަފާސް ހިސާބުތައް ދައްކާގޮތުން ސެޕްޓެމްބަރުމަހު ރާއްޖެއިން 37 މިލިއަން ރުފިޔާގެ ތާޒާ ކަޅުބިލަމަސްވަނީ ބޭރުކޮށްފައެވެ. އޮގަސްޓުމަހު ރާއްޖެއިން އެކްސްޕޯޓުކޮށްފައިވަނީ 42 މިލިއަން ރުފިޔާގެ ތާޒާ ކަޅުބިލަމަހެވެ.
ރާއްޖެއިން އެކްސްޕޯޓްކުރި މަހުގެ 53 އިންސައްތަ އެކްސްޕޯޓް ކުރީ ތައިލެންޑަށެވެ. އެޤައުމަށް މަސް ބޭރުކޮށްގެން 130 މިލިޔަން ރުފިޔާ ލިބިފައިވާކަމަށް ކަސްޓަމްސްގެ ތަފާސްހިސާބުތަކުން ދައްކައެވެ.
ދެވަނައަށް އެންމެ ގިނަ އަދަދަކަށް މަސް އެކްސްޕޯޓުކޮށްފައިވަނީ އިނގިރޭސިވިލާތަށެވެ. އެޤައުމަށް މަސް އެކްސްޕޯޓުކޮށްގެން 18 މިލިއަން ރުފިޔާވަނީ ލިބިފައެވެ.
