ހުޅުލޭ ފަޅުތެރެއިން "ކަންނެލި ހިބަރެއް" ހިފައިފި

މިއަދު ހެނދުނު ހުޅުލޭ ފަޅަށް ވަތް "ކަންނެލި ހިބަރެއް" ހިފައިފިއެވެ.

ސޯޝަލް މީޑިއާގައި މިހާރު ދައުރުވަމުންދާ ވީޑިއޯތަކުން ފެންނަ ގޮތުން މި ހިބަރު ހިފާފައިވަނީ ޖެޓީމަތީގައި ހުރެ ދާވަނި އަޅުވައިގެންނެވެ. މަސްވެރިން އެމްވީއަށް މަޢުލޫމާތުދެމުން އެވަގުތު އެސަރަހައްދުގައި ހުރި މީހަކު ބުނީ ހިބަރު ޖެޓީއަށް ނެގުނީ 3 ފަހަރު ދާވަނި އަޅުވައިގެން ކަމަށެވެ.

"ހިބަރު އައިސް ހުރީ ޖެޓީގެ ކަނުގައި އެނބުރި އެނބުރި. ގާތްގަނޑަކަށް 3 ފަހަރު ދާވަނި އަޅުވައިގެން ނެގުނީ. ފުރަތަމަ 2 ފަހަރުވެސް ދާވަނި އަޅުވައިގެން ނަގަންއުޅެނިކޮށް ނައްޓައިގެން ވެއްޓެނީ. ވެއްޓުނީމަވެސް ދާކަށެއް ނޫނޭ. ހަމަ އެނބުރި އެނބުރި ހުންނަނީ. ގާތްގަނޑަކަށް 8 ފޫޓު ނޫނީ 9 ފޫޓު ހުންނާނެ އެ ހިބަރުގަ. ހިބަރު ހިފީ އެއަރޕޯޓުގެ މުވައްޒަފުން". އެވަގުތު އެސަރަހައްދުގައި ހުރި މީހަކު ބުންޏެވެ.

ކަންނެލި ހިބަރަށް ރާއްޖޭގެ ބައެއް ހިސާބުތަކުގައި ތުންގަނޑު ހިބަރޭވެސް ކިޔައެވެ. މިއީ އާންމުކޮށް މާކަނޑުތަކުގައި އުޅޭ ހިބަރެކެވެ. މި ހިބަރަކީ ދުނިޔޭގެ މައިގަނޑު ތިން ކަނޑު ކަމުގައިވާ އެޓްލާންޓިކް ކަނޑާއި، ޕެސިފިކް ކަނޑު އަދި އިންޑިއާ ކަނޑުގެ ދުނިޔޭގެ ދެބައިހަމަ (އީކުއޭޓަރ) ސަރަޙައްދުގެ ހޫނު (ޓްރޮޕިކަލް) ކަނޑުތަކުގައްޔާއި މެދު މިންވަރަކަށް ހޫނު (ސަބް-ޓްރޮޕިކަލް) ސަރަޙައްދުތަކުގައި އުޅޭ މަހެކެވެ. އަދި މަދު ހާލަތްތަކުގައި ފިނި (ޓެމްޕަރޭޓް) ކަނޑުތަކުގައި ވެސް ތުންގަނޑު ހިބަރު އުޅެއެވެ.

ދިވެހިރާއްޖޭގައި އަތޮޅުތަކުގެ އެތެރެވަރީގައި އާންމުކޮށް އުޅެނީ ފަންގަނޑު ހިބަރެވެ.