މިއަހަރުގެ އޭޕްރީލް މަހުން ފެށިގެން ބޮޑުކަންނެލި ކިލޯއެއްގެ އަގު 100 ރުފިޔާއިން މަތީގައި ހުރުމަށްފަހު ކަންނެލި ކިލޯއެއްގެ އަގު 100 ރުފިޔާއިން ދަށަށް ވެއްޓިއްޖެއެވެ.
ބޮޑުކަންނެލި މަސްވެރިންގެ ޔޫނިއަނުން ކޮންމެ ދުވަހަކުވެސް އާންމުކުރަމުންދާ އަގުތަކަށް ބަލާއިރު ކަންނެލި ގަންނަ ބޮޑެތި ކުންފުނިތަކުން މިއަދު ކަންނެލި ގަންނަނީ 100 ރުފިޔާއިން ދަށުންނެވެ. މިގޮތުން އެންސިސް، ސީޕްރިއާ، އޯޝަން ފްރެޝް އަދި އޯޝަން ހަންޓާއިން 30 ކިލޯއިން މަތީގެ ކަންނެލި ކިލޯއެއް މިއަދު ގަންނަނީ 90 ރުފިޔާއަށެވެ. ބިގްފިޝްއިން ކަންނެލި ކިލޯއެއް މިއަދު ގަންނަނީ 95 ރުފިޔާއަށެވެ. ގިނަ ކުންފުނިތަކުން ކަންނެލީގެ އަގު މިގޮތުގައި ހުރިނަމަވެސް ހިންމަފުށީގައި ހުންނަ އެމްކިޔޫއެސްއާއި ސީއެމްއެފްއިން ކަންނެލި ކިލޯއެއް އަދިވެސް ގަންނަނީ 100 ރުފިޔާއަށެވެ.
މިއީ ފާއިތުވި 7 މަސް ދުވަހު ބޮޑުކަންނެލީގެ އަގު 100 ރުފިޔާއިން ދަށަށް ދިޔަ ފުރަތަމަ ފަހަރެވެ. މި މުއްދަތުގެ ތެރޭގައި ކަންނެލި ކިލޯއެއްގެ އަގު އެވްރެޖްކޮށް އުޅުނީ 100 ރުފިޔާއާއި 120 ރުފިޔާއާ ދެމެދުގެ އަގެއްގައެވެ. މިއަހަރުގެ ޖުލައިމަހު ކަންނެލި ކިލޯއެއްގެ އަގު 125 ރުފިޔާއަށްވެސް އެރިއެވެ.
