މަސްވެރިންނަށް ދިމާވާ ދަތިތައް ހައްލުކޮށްދިނުމަށް ޕީއެންސީ ޕާލިމެންޓްރީ ގްރޫޕުގެ ލީޑަރު މަޑުއްވަރީ ދާއިރާގެ މެމްބަރު އާދަމް ޝަރީފު އުމަރު ހުށައެޅި ޤަރާރަށް ބަހުސް ކުރަން ފަށައިފިއެވެ.
މި ޤަރާރު ހުށައަޅުއްވަމުން މަޑުއްވަރީ ދާއިރާގެ މެމްބަރު އާދަމް ޝަރީފު އުމަރު ވިދާޅުވީ، މަސްވެރިކަން ތަރައްޤީ ކުރާ ޥާހަކައާއި، މަސްވެރިންނަށް ދިމާވާ ދަތިތައް ހައްލުކޮށްދިނުމުގެ ވާހަކައަކީ އަބަދުވެސް އަޑުއިވެމުންދާ "ނާނާ" އެއްފަދަ ވާހަކައެއް ކަމަށެވެ. މަސްވެރިން ބާނާ މަހަށް ހަމައަގު ހޯދައިދިނުމުގައި ތަފާތު ވިސްނުމަކުން ވިސްނަންޖެހޭކަމަށް އާދަމް ޝަރީފު ވިދާޅުވިއެވެ.
މިގަރާރަކީ މަސްވެރިން ބާނާ މަސް ކިރުމަށްޓަކައި ކިޔޫގައި ޖެހިގެން ގިނަ ދުވަސް ތަކެއް ވަންދެން މަޑުކުރަންޖެހުމާ އެކަމާ ގުޅިގެން ބޭކާރު ގިނަގުނަ ހަރަދުތަކެއް ހިނގައި ތަކުލީފުތަކެއް އުފުލަން ޖެހުމާއި އަދި ކިރާ މަހަށް ފައިސާ ލިބުން ލަސްވުމާއި ކަޅުބިލަ މަހާއި ކަންނެލީގެ އަގު ދަށްވުމުގެ ސަބަބުން މަސްވެރިންނާއި އޮޑިވެރިންނަށް ކުރިމަތިވާ ދަތިތައް ހައްލުކޮށްދިނުމަށް ހުށަހަޅާ ގަރާރެއް ކަމަށް ވަނީ ބުނެފައެވެ.
އެގޮތުން މަސްވެރިން ބާނާ މަސް ނުކިރި އެތައް ދުވަހެއް ކިޔޫގައި މަސްކިރޭނެ ދުވަހެއްގެ އިންތިޒާރުގައި ރަށުން ބޭރުގައި ތިބެންޖެހުމާއި އެތައް ދުވަހެއް ކަނޑުމަތީގައި ހޭދަކޮށްގެން ބޮޑު ހަރަދުކޮށްގެން ބާނާ މަސްކޮޅު ނުކިރިގެން މަހަށް ނުފުރި ގިނަ ދުވަސްތަކެއް އާއިލާ އާ ދުރުގައި ތިބެން ޖެހުމާއި ކިރޭ މަސްކޮޅަށް ލިބެންޖެހޭ ފައިސާ ނުލިބި އެތައް ދުވަސްތަކެއް ވޭތުކުރަންޖެހޭ ކަމަށް އެގަރާރުގައި ބުނެއެވެ.
މީގެ އިތުރުން ކަޅުބިލަ މަހުގެ ކޮންޓްރޯލް އަގު ދޫކޮށްލުމުގެ ސަބަބުން ކަޅުބިލަ މަހުގެ އަގު ދަށަށް ދިއުމާއި އަދި އެކަށީގެންވާ އަދަދަކަށް ބޮޑުކަންނެލި ބޭނިއްޖެނަމަ ބައެއް ފަރާތްތަކުން ކަންނެލި ގަންނަ އަގު ދަށްކުރުމުގެ ސަބަބުން މަސްވެރިންނާއި އޮޑިވެރިންނާއި މަސްވެރި އާއިލާތަކަށް ގެއްލުން ލިބި ބޮޑެތި ގޮންޖެހުންތައް ކުރިމަތިވަމުންދާ ކަން ވެސް އެގަރާރުގައި ވަނީ ފާހަގަކޮށްފައެވެ.
އެ މައްސަލަތަކަށް ހައްލު ހޯދައިދިނުމާ މަސްވެރިން ބާނާ މަސް އަވަހަށް ކިރޭނެ ގޮތާ ކިރޭ މަސްކޮޅަށް ވަގުތުން ފައިސާ ލިބޭނެ އިންތިޒާމު ހަމަޖައްސައިދިނުމާ މަސްވެރި އާއިލާތަކަށް ދިމާވާ ދަތިތައް ހައްލުކުރެވޭނެ ނިޒާމެއް ގާއިމުކޮށްދިނުމަށް ގަރާރުގައި ވަނީ ބުނެފައެވެ.
5 މެމްބަރަކަށް ބަހުސްގައި ބައިވެރިވުމަށް ފުރުޞަތު ދެއްވުމަށްފަހު ބަހުސް ވަނީ މެދުކަނޑާލާފައެވެ. މަޖިލީހުގެ ރިޔާސަތުން ވިދާޅުވީ، ބަހުސްގައި ބައިވެރިވާން އެދުނު ހުރިހާ މެމްބަރުންނަށްސް އެ ފުރުޞަތު ފަހުން ދެއްވާނެކަމަށެވެ. މި ޤަރާރާ ބެހޭގޮތުން މަޖިލީހުގައި މެމްބަރުން ދެއްކެވި ވާހަކަތަކުގެ ޚަބަރުތައް މަސްވެރިން އެމްވީން ގެނެސްދޭނެ ވާހަކަ ދަންނަވަމެވެ.
