މަރުވެގެން ލައްގާފައި ހުރި މަސްތަކެއް ކައިގެން ކެމްބޯޑިއާގެ އާއިލާއެއްގެ 6 މީހަކަށް އަވަސް ފަރުވާ ދޭން ޖެހިއްޖެއެވެ.
ކެމްބޯޑިއާގެ ސްޓަންގު ޓްރެންގު ޕްރޮވިންސްގައި ހިނގި މި ހާދިސާގައި ތަޤައްޔަރުވެފައިވާ މަސްތައްވަނީ އެ އާއިލާގެ 11 މީހެއް ކައިފައެވެ. އެހެންނަމަވެސް ބަލިވެފައިވަނީ އެ އާއިލާގެ 6 މީހެކެވެ.
މީކޮންގ ކޯރުގެ އައްސޭރީގައި ދިރިއުޅޭ އެ އާއިލާގެ މަސްވެރިންވަނީ މަހަށްގޮސް މަރުވެގެން ލައްގާފައިހުރި ބައެއް މަސްތައްވެސް ގެނެސްފައެވެ. މި މަސްތައް ކައްކައިގެން ކެއުމުން ބަނޑުގައި ރިއްސާ ބޭރަށް ހިނގަން ފެށުމުން، 6 މީހަކަށްވަނީ ހޮސްޕިޓަލްގައި އެޑްމިޓުކޮށްގެން ފަރުވާ ދީފައެވެ.
ޑޮކްޓަރުން ބުނީ މަރުވެފައިހުރި ކުނި މަސް ކެއުމުން ކާނާ ވިހަވެގެން އެމީހުންނަށް ފަރުވާ ދެމުންދާ ކަމަށެވެ. އަދި މިހާރު އެމީހުންގެ ހާލު އަންނަނީ ރަނގަޅުވަމުން ކަމަށް ޑޮކްޓަރުން ބުނެއެވެ.
